យោធាអ៊ីស្រាអែលបានសម្លាប់សមាជិកគ្រួសារតែមួយយ៉ាងហោច ២៥នាក់នៅសង្កាត់ Sabra ស្ថិតក្នុងទីក្រុងហ្កាហ្សា ពេលដែលពួកគេបង្កើនការវាយប្រហារនៅទូទាំងដែនដីឡោមព័ទ្ធមួយនេះ ។

ផ្ទះសម្បែងជាច្រើនខ្នងរងការទម្លាក់គ្រាប់បែកនៅព្រឹកថ្ងៃអាទិត្យ ដោយយន្តហោះចម្បាំងអ៊ីស្រាអែល នៅសង្កាត់ Sabra ជាទីដែលរថក្រោះអ៊ីស្រាអែល ចាប់ផ្តើមរុលចូលកាលពីចុងខែសីហា ដែលជាផ្នែកមួយនៃផែនការកម្ទេច និងរឹបអូសតំបន់មួយនេះ ។

មនុស្សយ៉ាងហោច ១៧នាក់ ត្រូវបានជួយសង្រ្គោះ ក្រោយការវាយប្រហារនោះ ហើយការងារជួយសង្រ្គោះនៅបន្ត ស្របពេលក្រុមឆ្លើយតបគ្រាអាសន្នដែលប្រើប្រាស់ដៃទទេររបស់ពួកគេ ដើម្បីកាយនៅកន្លែងកើតហេតុ និយាយថា ពួកគេមានការព្រួយបារម្ភថា មនុស្ស ៥០នាក់ បានជាប់នៅក្រោមគំនរបាក់បែកអគារ ។

 គ្រួសារប៉ាឡេស្ទីន បានធ្វើការអំពាវនាវបន្ទាន់សុំជំនួយ ដើម្បីព្យាយាមរំដោះអ្នកនៅជាប់ខ្លួនក្រោមគំនរបាក់បែកអគារ ។ សមាជិកគ្រួសារនៅកន្លែងកើតហេតុ និយាយថា ពួកគេនៅអាចឮសំឡេងស្រែកឲ្យជួយពីក្រោមគំនរបាក់បែក ។

 សមាជិកគ្រួសារមួយរូប និយាយថា លោកសូមអំពាវនាវដល់ពិភពលោកទាំងមូល សូមមេត្តាជួយពួកយើងផង ។ សាច់ញាតិរបស់ពួកយើងត្រូវបានកប់ទាំងរស់ ។ ពួកយើងនៅឮសំឡេងរបស់ពួកគេស្រែកឲ្យជួយ ពីក្រោមគំនរបាក់បាក់បែកនេះ ប៉ុន្តែពួកយើងមិនអាចទៅដល់ពួកគេបានទេ ៕