​ភ្នំពេញ៖ រាជរដ្ឋាភិបាលកម្ពុជា តាមរយៈគណៈកម្មាធិការជាតិរៀបចំបុណ្យជាតិ-អន្ដរជាតិ បានប្រកាសឱ្យរៀបចំចាត់ចែងពិធីបុណ្យមាឃបូជា នៅពាក់កណ្តាលខែកុម្ភៈ ឆ្នាំ២០២២ ប៉ុន្តែត្រូវមានវិធានការឲ្យបានត្រឹមត្រូវបំផុតស្របទៅតាមការណែនាំរបស់ក្រសួងសុខាភិបាល ក្នុងការបង្ការ និងទប់ស្កាត់ការឆ្លងរីករាលដាលជំងឺកូវីដ-១៩ បើទោះបីស្ថានភាពមេរោគនេះ បានស្ងប់ស្ងាត់ក៏ដោយ។

យោងតាមផែនការណែនាំរបស់គណៈកម្មាធិការជាតិ រៀបចំបុណ្យជាតិ-អន្ដរជាតិ ដែលបាន​បង្ហោះនាថ្ងៃទី២៨ ខែមករានេះ បានបញ្ជាក់ថា នៅថ្ងៃទី១៦-១៧ ខែកុម្ភៈ ឆ្នាំ២០២២ នៅ​បរិវេណ​ព្រះមហាសក្យមុនីចេតិយ​ ភ្នំរាជទ្រព្យ (ឧត្តុង្គ) ស្រុកពញាឮ​ ខេត្តកណ្ដាល នឹងត្រូវអនុញ្ញាត​ឲ្យ​រៀបចំពិធីបុណ្យមាឃបូជាដូចសព្វមួយដង​ ដោយត្រូវអនុវត្តតាមវិធានការសុខាភិបាល សំដៅបង្ការ និងទប់ស្កាត់ការឆ្លងជំងឺកូវីដ-១៩។

ផែនការណែនាំ បានឲ្យដឹងទៀតថា ជារៀងរាល់ឆ្នាំ ពុទ្ធសាសនិកខ្មែរ តែងតែប្រារព្ធធ្វើបុណ្យមាឃ​បូជា នៅគ្រប់វត្តអារាមទូទាំងប្រទេស ដោយចាត់ទុកថា «ជាការបំពេញកុសលដ៏ថ្លៃថ្លាបំផុត»។ គណៈកម្មាធិការជាតិ បានបញ្ជាក់ថា «រាជរដ្ឋាភិបាល នៃព្រះរាជាណាចក្រកម្ពុជា ក៏បានចាត់ចែង​រៀបចំ​ពិធីបុណ្យនេះ ​នៅបរិវេណព្រះមហាសក្យមុនីចេតិយ​ ភ្នំព្រះរាជទ្រព្យ​ (ឧត្ដុង្គ) ស្រុកពញាឮ ខេត្តកណ្តាល ​ដោយមានថ្នាក់ដឹកនាំជាន់ខ្ពស់​ ព្រឹទ្ធសភា រដ្ឋសភា រាជរដ្ឋាភិបាល មន្ត្រីរាជការ អ្នកមុខ អ្នកការ សាស្ត្រាចារ្យ លោកគ្រូ អ្នកគ្រូ និស្សិត សិស្ស សីលវន្ត សីលវតី និងពុទ្ធបរិស័ទ ចូលរួមបំពេញកុសល ស្របតាមរដ្ឋធម្មនុញ្ញ នៃព្រះរាជាណាចក្រកម្ពុជាដែលបានចែងថា ព្រះពុទ្ធ សាសនាជាសាសនារបស់រដ្ឋ»។

ពិធីបុណ្យមាឃបូជាគឺជាបុណ្យមួយក្នុងបណ្តាបុណ្យធំៗទាំងឡាយ ​ក្នុងព្រះពុទ្ធសាសនា ដែល​ប្រទេស​កាន់ព្រះពុទ្ធសាសនាលើសកលលោក​ តែងតែប្រារព្ធធ្វើពុំដែលខាន។

ពិធីនេះប្រារព្ធធ្វើឡើង ដើម្បី​រម្លឹក​ដល់​អភិលក្ខិត​សម័យ​ទាំងពីរ ​នៃ​សាសនា​ព្រះ​សម្មាសម្ពុទ្ធ​បរមគ្រូ ដែលកើតឡើង​នៅ​ថ្ងៃ​ពេញបូណ៌មី​ ខែ​មាឃ​ដូចគ្នា ​គឺថ្ងៃ​ប្រជុំ​ចតុរង្គ​សន្និបាត និង​ថ្ងៃ​ដែល​ព្រះអង្គ​ទ្រង់ប្រកាស​ដាក់​ព្រះជន្មាយុសង្ខារ៕ អត្ថបទ៖ បាន ចក់