ជនជាតិដើមភាគតិច និងកសិកររាប់រយនាក់ បាននាំគ្នាបិទផ្លូវនៅទូទាំងប្រទេសអេក្វាឌ័រ កាលពីថ្ងៃចន្ទ (ទី២២ ខែកញ្ញា) ដោយបានដុតរបាំង និងកំណាត់ឈើ ដែលជាការផ្គើននឹងវិធានការដាក់ប្រទេសក្នុងគ្រាអាសន្ន ដើម្បីបង្ហាញតវ៉ានឹងការកាត់បន្ថយការឧបត្ថម្ភធនរបស់រដ្ឋាភិបាល ចំពោះប្រេងម៉ាស៊ូត។

បាតុកម្មបានប្រែក្លាយជាអំពើហិង្សា នៅទីក្រុង Otavalo ភាគខាងជើងអេក្វាឌ័រ ដោយក្រុមបាតុករ បានដុតបំផ្លាញផ្នែកខាងក្នុងនប៉ុស្តិ៍នគរបាល និងរថយន្តនៅខាងក្រៅអគារ។ នគរបាលត្រូវបានគេមើលឃើញបានបាញ់ពន្លត់អណ្តាតភ្លើង ខណៈទាហានបានគប់កំប៉ុងឧស្ម័នបង្ហូរទឹកភ្នែកទៅលើបាតុករ។

ក្នុងខេត្ត Pichincha នៅប៉ែកខាងជើងភាគកណ្តាល ការដុតរបាំងមាននៅពាសពេញផ្លូវ ខណៈដែលកម្មករសាលាក្រុង បានប្រើរណាម៉ាស៊ីនកាត់កំណាត់ឈើដែលរារាំងចរាចរណ៍។ នគរបាលបានបន្តមានវត្តមានយ៉ាងខ្ជាប់ខ្ជួន នៅក្នុងតំបន់ដែលរងផលប៉ះពាល់។

គួរបញ្ជាក់ថា ការតវ៉ានេះកើតចេញពីការសម្រេចរបស់រដ្ឋាភិបាលកាលពីសប្តាហ៍មុន ដើម្បីលុបបំបាត់ការឧបត្ថម្ភធនប្រេងម៉ាស៊ូតចំនួន ១,១ពាន់លានដុល្លារ ដែលប្រើប្រាស់ដោយរថយន្តដឹកជញ្ជូនធុនធ្ងន់ អ្នកដំណើរ និងវិស័យកសិកម្ម។ ការដកប្រាក់ឧបត្ថម្ភធនបានធ្វើឲ្យតម្លៃប្រេងម៉ាស៊ូតឡើងពី ១,៨០ដុល្លារ ទៅដល់ ២,៨០ដុល្លារ ក្នុងមួយហ្គាឡុង ជាអ្វីដែលជំរុញឲ្យមានការប្រឆាំងយ៉ាងទូលំទូលាយពីក្រុមអ្នកតវ៉ាដែលជំទាស់ថា វិធានការនេះនឹងនាំឲ្យតម្លៃនៃការរស់នៅចំណាយកាន់តែខ្ពស់។

កាលពីសប្តាហ៍មុន លោកប្រធានាធិបតី Daniel Noboa បានប្រកាសដាក់ប្រទេសក្នុងគ្រាអាសន្នរយៈពេល ៦០ថ្ងៃ នៅក្នុងខេត្តចំនួន ៧៕