នៅក្នុងសេចក្តីថ្លែងការណ៍រួមដែលបានចេញផ្សាយ បន្ទាប់ពីកិច្ចប្រជុំ កាលពីថ្ងៃចន្ទ (ទី២២ ខែកញ្ញា) រដ្ឋមន្ត្រីការបរទេសកូរ៉េខាងត្បូង ជប៉ុន និងសហរដ្ឋអាមេរិក បានបង្ហាញក្ដីបារម្ភ អំពីសកម្មភាពអស្ថិរភាពកាន់តែខ្លាំងឡើងៗ នៅជុំវិញកោះតៃវ៉ាន់។

សេចក្តីថ្លែងការណ៍បានឲ្យដឹងទៀតថា រដ្ឋមន្ត្រីទាំង៣ ក៏បានសម្តែងការប្រឆាំងយ៉ាងខ្លាំងក្លា ចំពោះ «ការអះអាងសិទ្ធិដែនសមុទ្រដោយខុសច្បាប់» នៅក្នុងសមុទ្រចិនខាងត្បូង និងការប៉ុនប៉ងអនុវត្តការទាមទារបែបនេះ។

តែយ៉ាងណាក្ដី សេចក្តីថ្លែងការណ៍នេះមិនបានលើកឡើងជាពិសេសអំពីប្រទេសចិននោះឡើយ ប៉ុន្តែកើតឡើងចំពេលដែលមានភាពតានតឹង រវាងទីក្រុងប៉េកាំង និងទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួន ជុំវិញជម្លោះសមុទ្រចិនខាងត្បូង។

គួរបញ្ជាក់ថា ចិនទាមទារស្ទើរតែទាំងស្រុងនូវសមុទ្រចិនខាងត្បូង ដោយត្រួតលើតំបន់សេដ្ឋកិច្ចផ្តាច់មុខរបស់ប្រ៊ុយណេ ឥណ្ឌូនេស៊ី ម៉ាឡេស៊ី ហ្វីលីពីន និងវៀតណាម។ ជម្លោះដែលមិនអាចដោះស្រាយបាននេះ បានអូសបន្លាយអស់រយៈពេលជាច្រើនឆ្នាំមកហើយ ជុំវិញការកាន់កាប់កោះ និងតំបន់ភូមិសាស្ត្រាផ្សេងៗ។

សេចក្តីថ្លែងការណ៍រួមរបស់រដ្ឋមន្ត្រីទាំង៣ បានបញ្ជាក់បន្ថែមថា រដ្ឋមន្ត្រីការបរទេសអាមេរិក លោក Marco Rubio រដ្ឋមន្ត្រីការបរទេសកូរ៉េខាងត្បូង លោក Cho Hyun និងរដ្ឋមន្ត្រីការបរទេសជប៉ុន លោក Iwaya Takeshi បានជួបប្រជុំគ្នានៅទីក្រុងញូវយ៉ក សហរដ្ឋអាមេរិក ជាកន្លែងដែលពួកលោកក៏បានពិភាក្សាផងដែរ អំពីការបន្តការប្តេជ្ញាចិត្តរបស់ប្រទេសទាំង៣ ក្នុងការបញ្ចប់កម្មវិធីនុយក្លេអ៊ែររបស់កូរ៉េខាងជើង៕