បាតុករគាំទ្រប៉ាឡេស្ទីនរាប់រយនាក់បានដើរដង្ហែទៅកាន់កំពង់ផែក្នុងទីក្រុង Genoa កាលពីថ្ងៃចន្ទ (ទី២២ ខែកញ្ញា) ជាកំពង់ផែមួយក្នុងចំណោមកំពង់ផែជាច្រើនដែលត្រូវបានរាំងខ្ទប់ ក្នុងប្រទេសអ៊ីតាលី ដោយកម្មករផែ និងអ្នកតវ៉ា ដែលទាមទារឲ្យប្រទេសអ៊ីតាលីបញ្ឈប់ការប្រើទីចតទាំងនេះ សម្រាប់ការផ្ទេរអាវុធ និងការផ្គត់ផ្គង់ផ្សេងទៀតទៅឲ្យអ៊ីស្រាអែលដែលកំពុងមានសង្គ្រាមជាមួយក្រុមហាម៉ាស នៅតំបន់ហ្កាហ្សា។

ការតវ៉ានេះគឺជាផ្នែកមួយនៃកូដកម្មទូទាំងប្រទេសដែលអំពាវនាវដោយសហជីពពាណិជ្ជកម្ម ប្រឆាំងនឹងការសម្លាប់ប្រជាជនប៉ាឡេស្ទីន នៅក្នុងតំបន់ហ្កាហ្សា។ ក្រុមបាតុករ នៅទីក្រុង Genoa ខ្លះពាក់អាវយឺត ដែលមាននិមិត្តសញ្ញា «Ports Closed to War» (កំពុងផែត្រូវបិទមិនបម្រើឲ្យសង្គ្រាម) បានគ្រវីទង់ជាតិប៉ាឡេស្ទីន និងស្រែកថា «Free Palestine» (ផ្ដល់សេរីភាពឲ្យប៉ាឡេស្ទីន) នៅពេលពួកគេដើរឆ្ពោះទៅកាន់កំពង់ផែ។

នៅពេលនោះ បាតុករមួយចំនួន បានគប់ភ្លើងដាក់នគរបាលដែលបិទផ្លូវ។ ការតវ៉ាត្រូវបានធ្វើឡើងនៅក្នុងទីក្រុង ទូទាំងប្រទេសអ៊ីតាលី សាលារៀនត្រូវបានបិទ ហើយកូដកម្មបានប៉ះពាល់ដល់ការដឹកជញ្ជូនសាធារណៈមួយចំនួន។ នៅឯកំពង់ផែក្នុងទីក្រុង Venice នគរបាលបានដាក់ពង្រាយកាណុងបាញ់ទឹក ដើម្បីជួយបំបែកបាតុកម្ម។ កម្មករក៏បានធ្វើបាតុកម្មនៅកំពង់ផែ ក្នុងទីក្រុង Genoa, Livorno និង Trieste។

ចំណែកនគរបាល ក្នុងឧបករណ៍បង្គ្រាបកុបកម្ម បានបាញ់ឧស្ម័នបង្ហូរទឹកភ្នែក ដើម្បីព្យាយាមបំបែកក្រុមអ្នកតវ៉ា នៅស្ថានីយដ៏សំខាន់ ក្នុងទីក្រុង Milan។ ទីភ្នាក់ងារសារព័ត៌មាន ANSA របស់អ៊ីតាលី បានរាយការណ៍ថា មនុស្សជាង ១០នាក់ ត្រូវបានចាប់ខ្លួននៅក្នុងទីក្រុង Milan ហើយមន្រ្តីនគរបាលប្រហែល ៦០នាក់ បានរងរបួសមានស្នាមជាំ ឬរបួសធ្ងន់ធ្ងរជាងនោះ។

សេវារថភ្លើងក្នុងតំបន់ទៅកាន់ទីក្រុងរ៉ូម បានប្រឈមនឹងការពន្យារពេល និងលុបចោលចោល ដោយសារកូដកម្ម ប៉ុន្តែផ្លូវរថភ្លើងក្រោមដីបានដំណើរការជាធម្មតា។ ខ្សែរថភ្លើងក្រោមដីភាគច្រើន នៅក្នុងទីក្រុង Milan ដែលជារដ្ឋធានីហិរញ្ញវត្ថុរបស់អ៊ីតាលី ក៏កំពុងដំណើរការផងដែរ៕