យោងតាមអធិការនគរបាលតំបន់បានឲ្យដឹងថា កុបកម្មនៅពន្ធនាគារបង្កឡើងដោយការវាយប្រហាររបស់ក្រុមជនអន្ធពាលនៅភាគខាងត្បូងប្រទេសអេក្វាឌ័រ បានបណ្តាលឲ្យមនុស្ស១៤នាក់ស្លាប់ និង១៤ នាក់ផ្សេងទៀតរងរបួស ។

អធិការនគរបបាល លោក William Calle បានប្រាប់បណ្តាញទូរទស្សន៍ Ecuavisa ថា អ្នកទោសនៅក្នុងទីក្រុងកំពង់ផែ Machala ភាគខាងត្បូងទីក្រុង Guayaquil បានប៉ះទង្គិចជាមួយអាជ្ញាធរ ដោយបានសម្លាប់ឆ្មាំម្នាក់ និងចាប់ពង្រត់មន្រ្តីច្រើននាក់។

នគរបាលប្រទេសអេក្វាឌ័របាននិយាយនៅក្នុងសេចក្តីថ្លែងការណ៍ថា អ្នកទោសមួយចំនួនបានរត់គេចខ្លួន ហើយ១៣នាក់ត្រូវបានចាប់ខ្លួនយកមកវិញ។ សេចក្តីថ្លែងការណ៍និយាយថា «មន្រ្តីឯកសណ្ឋានបានប្រឈមមុខជាមួយអ្នកទោសប្រដាប់អាវុធយ៉ាងច្រើនដែលព្យាយាមរត់គេចខ្លួន និងបានរក្សាការគ្រប់គ្រងនៅពន្ធនាគារ»។

អាជ្ញាធរនិយាយថា អំពើហិង្សាបានចាប់ផ្តើមបន្ទាប់ពីការប្រឈមមុខគ្នាដោយហិង្សារវាងសមាជិកក្រុមជនអន្ធពាល Los Lobos និងក្រុម Sao Box ដែលនគរបាលនិយាយយោងទៅរកអង្គការឧក្រិដ្ឋកម្ម។

ប្រទេសអេក្វាឌ័រ ត្រូវបានញាំញីដោយកុបកម្មក្នុងពន្ធនាគារក្នុងរយៈពេលប៉ុន្មានឆ្នាំថ្មីៗនេះ ដោយអ្នកទោសរាប់រយនាក់ត្រូវបានសម្លាប់។ រដ្ឋាភិបាលរបស់លោកប្រធានាធិបតី Daniel Noboa បានប្តេជ្ញាបង្ក្រាបឧក្រិដ្ឋកម្ម ដោយបានកំណត់ថាជាការប៉ះទង្គិចគ្នាជាមួយក្រុមជនអន្ធពាលដែលកំពុងព្យាយាមដណ្តើមយកដែនដី និងការគ្រប់គ្រង។