ប្រេសិតជាន់ខ្ពស់សហរដ្ឋអាមេរិកមួយរូប បាននិយាយកាលពីថ្ងៃអង្គារ (២៣ កញ្ញា) ថា ស៊ីរី និងអ៊ីស្រាអែល ជិតឈានដល់កិច្ចព្រមព្រៀង "បន្ធូរបន្ថយភាពតានតឹង" ជាមួយគ្នាហើយ ដែលនឹងមើលឃើញអ៊ីស្រាអែល បញ្ឈប់ការវាយប្រហាររបស់ខ្លួន ខណៈស៊ីរីនឹងយល់ព្រមមិនផ្លាស់ទីគ្រឿងចក្រ ឬឧបករណ៍ធុនធ្ងន់ណាមួយនៅជិតព្រំដែនអ៊ីស្រាអែលឡើយ។

ថ្លែងទៅកាន់អ្នកសារព័ត៌មាននៅក្រៅកិច្ចប្រជុំមហាសន្និបាតអង្គការសហប្រជាជាតិ UNGA ទីក្រុងញូវយ៉ក ប្រេសិតពិសេសអាមេរិកទទួលបន្ទុកស៊ីរី លោក Tom Barrack បាននិយាយថា កិច្ចព្រមព្រៀងនេះនឹងបម្រើជាជំហានដំបូងឆ្ពោះទៅរកកិច្ចព្រមព្រៀងសន្តិសុខដែលប្រទេសទាំងពីរកំពុងចរចា។

គួរឱ្យដឹងថា ស៊ីរី និងអ៊ីស្រាអែលកំពុងពិភាក្សាគ្នាដើម្បីសម្រេចបានកិច្ចព្រមព្រៀងមួយ ដែលទីក្រុងដាម៉ាសសង្ឃឹមថា នឹងធានាបាននូវការបញ្ឈប់ការវាយប្រហារតាមអាកាសរបស់អ៊ីស្រាអែល និងការដកទ័ពអ៊ីស្រាអែល ដែលកំពុងរុញច្រានចូលក្នុងភាគខាងត្បូងស៊ីរី។

លោក Barrack បានលើកឡើងថា ប្រធានាធិបតីអាមេរិក លោក Donald Trump បានព្យាយាមធ្វើកិច្ចព្រមព្រៀងរវាងភាគីទាំងពីរ ដែលនឹងត្រូវប្រកាសក្នុងសប្តាហ៍នេះ ប៉ុន្តែមិនទាន់មានវឌ្ឍនភាពគ្រប់គ្រាន់ទេមកទល់ពេលនេះ ហើយស្របពេលថ្ងៃឈប់សម្រាកបុណ្យចូលឆ្នាំថ្មីរបស់ជនជាតិជ្វីហ្វនៅសប្តាហ៍នេះ ក៏បានធ្វើឱ្យកិច្ចពិភាក្សាយឺតយ៉ាវថែមទៀត។

អ៊ីស្រាអែល និងស៊ីរី គឺជាសត្រូវនៅមជ្ឈិមបូព៌ាអស់ជាច្រើនទសវត្សរ៍មកហើយ។ ទោះបីជាមានការផ្តួលរំលំអតីតប្រធានាធិបតីស៊ីរី Bashar al-Assad កាលពីខែធ្នូឆ្នាំមុនក៏ដោយ ក៏ជម្លោះទឹកដី និងការមិនទុកចិត្តផ្នែកនយោបាយដ៏ស៊ីជម្រៅរវាងប្រទេសទាំងពីរនៅតែមានដដែល៕