រដ្ឋមន្ត្រីការបរទេសអាមេរិក លោក Marco Rubio បានព្រមានកាលពីថ្ងៃអង្គារ (២៣ កញ្ញា) ថា ការអត់ធ្មត់របស់ទីក្រុងវ៉ាស៊ីនតោន ជាមួយរុស្ស៊ីគឺ "មានដែនកំណត់" ដោយអំពាវនាវឱ្យជំរុញកិច្ចប្រឹងប្រែងសន្តិភាពកាន់តែខ្លាំងឡើង ខណៈក៏ផ្ដល់សញ្ញាថា ប្រធានាធិបតីអាមេរិក លោក Donald Trump ត្រៀមខ្លួនជាស្រេចដើម្បីបន្ថែមសម្ពាធកាន់តែខ្លាំង "នៃការបង់ខាតតម្លៃសេដ្ឋកិច្ច" ប្រសិនបើការចរចាបរាជ័យ។

ថ្លែងប្រាប់កិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្តីពីអ៊ុយក្រែន លោក Rubio និយាយថា៖ ប្រធានាធិបតី Trump ជាមនុស្សមានការអត់ធ្មត់ខ្ពស់ណាស់ លោកប្តេជ្ញាចិត្តយ៉ាងខ្លាំងចំពោះសន្តិភាព ប៉ុន្តែការអត់ធ្មត់របស់លោកមិនមែន "គ្មានដែនកំណត់" នោះទេ។ ប្រមុខការទូតរូបនេះបន្តថា លោក Trump បានបដិសេធមិនដាក់ទណ្ឌកម្មព្រោះសង្ឃឹមថា នឹងមានការទម្លាយភាពជាប់គាំង ប៉ុន្តែក៏នឹងមានចំណុចមួយ នៅពេលដែលក្រុងវ៉ាស៊ីនតោន សន្និដ្ឋានចុងក្រោយថា រុស្ស៊ីមិនចាប់អារម្មណ៍ចំពោះដំណោះស្រាយដោយសន្តិវិធីឡើយ។

លោក Rubio សង្កត់ធ្ងន់ថា នៅពេលនោះមកដល់ រដ្ឋបាលអាមេរិកត្រៀមជាស្រេចដើម្បីដាក់សម្ពាធសេដ្ឋកិច្ចបន្ថែមកាន់តែខ្លាំងលើរុស្ស៊ី។ យ៉ាងណាមិញ លោក Rubio បាននិយាយសម្រាលថា សហរដ្ឋអាមេរិកនៅតែបើកចំហចំពោះដំណោះស្រាយដោយសន្តិវិធីចំពោះសង្គ្រាមរុស្ស៊ី-អ៊ុយក្រែនជានិច្ច។

ការអត្ថាធិប្បាយនេះកើតឡើងប៉ុន្មានម៉ោង បន្ទាប់ពីលោក Trump បាននិយាយថា ឥឡូវនេះ អ៊ុយក្រែនអាចដណ្តើមយកមកវិញនូវទឹកដីដែលត្រូវរុស្ស៊ីកាន់កាប់ទាំងអស់ ដោយលើកឡើងពី "បញ្ហាសេដ្ឋកិច្ចដ៏ធំ" របស់រុស្ស៊ី និងបានចំអកដាក់ទីក្រុងមូស្គូថាគ្រាន់តែជា "ខ្លាក្រដាស" ប៉ុណ្ណោះ៕