ភ្នំពេញ៖ ក្រុមសភាកម្ពុជានៃអ្នកនយោបាយស្ត្រី បានរៀបចំយុទ្ធនាការនារីវ័យក្មេងឆ្ពោះទៅភាពជាអ្នកដឹកនាំ ដើម្បីឲ្យនារីបានចូលរួមក្នុងនយោបាយកាន់តែច្រើនជាងមុន។
ក្រុមសភាជាតិកម្ពុជានៃអ្នកនយោបាយស្ត្រី នៅថ្ងៃទី២៧ ខែមករា ឆ្នាំ២០២២ បានរៀបចំ “យុទ្ធនាការនារីវ័យក្មេងឆ្ពោះទៅភាពជាអ្នកដឹកនាំ ដោយធ្វើឡើងនៅក្នុងវិទ្យាល័យ ហ៊ុន សែន កោះអណ្តែត ស្ថិតនៅឃុំរមេញ ស្រុកកោះអណ្តែត ខេត្តតាកែវ ក្រោមអធិបតី លោកជំទាវ និន សាផុន អ្នកតំណាងរាស្ត្រមណ្ឌលខេត្តតាកែវ និងជាអនុប្រធានក្រុមសភាជាតិកម្ពុជានៃអ្នកនយោបាយសភាស្ត្រី។ យុទ្ធនាការនេះមានការចូលរួមពីភាគីពាក់ព័ន្ធជាច្រើន ដើម្បីលើកពីប្រធានបទផ្សេងៗគ្នា ចែករំលែកពីបទពិសោធន៍ការងារផ្ទាល់ខ្លួនកន្លងមក រហូតបានក្លាយជាសមាជិកសភា និងបានក្លាយជាអ្នកធ្វើសេចក្តីសម្រេចនៅក្នុងស្ថាប័នអង្គភាពរបស់ខ្លួនបង្ហាញអំពីតួនាទីភារកិច្ចរបស់សមាជិកាសភា ជាពិសេសតួនាទីភារកិច្ចរបស់ក្រុមសភាជាតិកម្ពុជានៃអ្នកនយោបាយស្ត្រីក្នុងភាពជាអ្នកដឹកនាំ។
លោកជំទាវ និន សាផុន បានលើកឡើងថា យុទ្ធនាការនេះ ធ្វើឡើងក្នុងគោលបំណង ផ្តល់ការណែនាំអំពីជីវិតនយោបាយផ្ទាល់ខ្លួនរបស់សមាជិកាសភាកម្ពុជា ជាស្ត្រី ទៅដល់នារីវ័យក្មេង និងបង្ហាញនារីវ័យក្មេងថា នយោបាយគឺជាការងាររបស់ស្ត្រី និងជម្រុញឱ្យនារីវ័យក្មេងពិចារណាអនាគតក្នុងភាពជាអ្នកដឹកនាំ ដើម្បីឱ្យនារីវ័យក្មេងចូលរួមក្នុងនយោបាយកាន់តែច្រើន ដើម្បីសម្រេចបាននូវសមភាពយេនឌ័រ និងសំដៅជំរុញឱ្យនារីវ័យក្មេងអាចកសាងទំនុកចិត្តលើខ្លួនឯងកាន់តែខ្ពស់ មានក្តីសុបិន្តធំ នឹងយកគំរូតាមអ្នកនយោបាយជាស្ត្រី។
ក្នុងកម្មវិធីនេះក៏បានបង្ហាញពីការចូលរួមរបស់ស្ត្រីក្នុងការលើកកម្ពស់សមភាពយេនឌ័រ ការផ្តល់ភាពអង់អាចដល់ស្ត្រី គន្លឹះក្នុងការកសាងខ្លួនឆ្ពោះទៅកាន់ភាពជាអ្នកដឹកនាំ បង្ហាញពីបទពិសោធន៍លើការងារតស៊ូក្នុងការងារដោះស្រាយបញ្ហាប្រឈមរបស់ស្ត្រីក្នុងជីវិតរស់នៅ ការចូលរួមរបស់ស្ត្រីក្នុងការប្រយុទ្ធប្រឆាំងជាមួយកូវីដ-១៩ និងគោលនយោបាយជាតិឆ្លើយតបទៅនឹងវិបត្តិកូវីដ-១៩ លើបញ្ហាសង្គម និងព័ត៌មាន។
យុទ្ធនាការនេះ មានការចូលរួមពីលោកជំទាវ នូ សុវណ្ណនី តំណាងរាស្ត្រមណ្ឌលខេត្តតាកែវ និងជាសមាជិកាគណៈកម្មការទី៩នៃរដ្ឋសភា ក្រុមការងារមជ្ឈមមណ្ឌលសភាអាស៊ី ស្ត្រីនៅមូលដ្ឋានធ្វើការអំពីសមភាពយេនឌ័រ មន្ត្រីនៃអគ្គលេខាធិការដ្ឋានរដ្ឋសភា អង្គភាពពាក់ព័ន្ធមួយចំនួនជុំវិញខេត្ត លោកគ្រូ អ្នកគ្រូ សិស្សានុសិស្ស នៅក្នុងស្រុកកោះអណ្តែត ប្រមាណជាង ២៥០នាក់។
គួររម្លឹកថា កម្មវិធីយុទ្ធនាការនារីវ័យក្មេងឆ្ពោះទៅភាពជាអ្នកដឹកនាំនេះ គឺជាលើកទី៦ ដែលក្រុមសភាជាតិកម្ពុជានៃអ្នកនយោបាយសភាស្ត្រី បានរៀបចំកម្មវិធីនេះឡើង សហការរៀបចំដោយ អគ្គលេខាធិការដ្ឋានរដ្ឋសភា មជ្ឈមណ្ឌលសភាអាស៊ី និងលេខាធិការដ្ឋានក្រុមសភាជាតិកម្ពុជានៃអ្នកនយោបាយសភាស្ត្រី “ក.ស.ក.ន.ស”៕ អត្ថបទ៖ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
