ទីភ្នាក់ងារព័ត៌មានរដ្ឋ TASS របស់រុស្ស៊ីរាយការណ៍ថា ប្រព័ន្ធការពារដែនអាកាសរបស់ប្រទេស បានបាញ់ទម្លាក់យានដ្រូនរបស់អ៊ុយក្រែនចំនួន៤៤គ្រឿង ដែលត្រូវបានបង្ហោះចូលទៅទីក្រុងមូស្គូ ចាប់តាំងពីល្ងាចថ្ងៃច័ន្ទដល់ថ្ងៃអង្គារ។

សារព័ត៌មានTASS បានរាយការណ៍ពីការវាយប្រហារដោយយានដ្រូន ប៉ុន្តែពុំមានអ្នកស្លាប់និងរងរបួសត្រូវបានរាយការណ៍ទេ ខណៈជើងហោះហើរជាង២០០ត្រូវបានពន្យារពេល ឬលុបចោលនៅអាកាសយានដ្ឋានចំនួនបួនក្នុងទីក្រុងមូស្គូ។

ប្រព័ន្ធផ្សព្វផ្សាយឯករាជ្យរបស់រុស្ស៊ីនិយាយថា ការផ្ទុះជាច្រើនកន្លែងត្រូវបានគេឮនៅតំបន់ដ៏ធំទូលាយក្នុងទីក្រុងមូស្គូ ជាពិសេសនៅភាគខាងត្បូងទីក្រុង។

ទន្ទឹមនឹងនេះ អង្គភាពសេវាសង្គ្រោះបន្ទាន់រដ្ឋរបស់អ៊ុយក្រែនបាននិយាយនៅក្នុងការបង្ហោះលើបណ្តាញផ្សព្វផ្សាយសង្គមកាលពីថ្ងៃអង្គារថា មនុស្សពីរនាក់ត្រូវបានសម្លាប់ក្នុងការវាយប្រហាររបស់រុស្ស៊ីនៅក្នុងតំបន់ភាគខាងត្បូងទីក្រុងOdesa និងទីក្រុង Zaporizhzhia ។