ប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) ដែលបាននិយាយបែបនេះ ក្នុងអំឡុងពេលកិច្ច ប្រជុំជាមួយប្រធានាធិបតីអាមេរិកលោក ដូណាល់ ត្រាំ ( Donald Trump) ជឿជាក់ថា វិធីសាស្រ្តយោធាប្រឆាំងនឹងក្រុមសកម្មប្រយុទ្ធប៉ាឡេស្ទីនហាម៉ាស គឺមិនមានប្រសិទ្ធភាពទេ ហើយវិធីសាស្រ្តដ៏ទូលំទូលាយមួយ គឺត្រូវការជាចាំបាច់។

លោកប្រធានាធិបតីបារាំង បាននិយាយក្នុងអំឡុងពេលវត្តមានរបស់អ្នកសារព័ត៌មាននៅពេលចាប់ផ្តើមកិច្ចប្រជុំរបស់មេដឹកនាំទាំងពីរ ដូចដែលបានដកស្រង់សម្តីដោយសារព័ត៌មាន AFPថា៖«អ៊ីស្រាអែល បានសម្លាប់មេដឹកនាំសំខាន់ៗរបស់ក្រុមហាម៉ាស។ នេះគឺជាជោគជ័យដ៏សំខាន់មួយ ប៉ុន្តែក្នុងពេលជាមួយគ្នានោះ មានក្រុមសកម្មប្រយុទ្ធហាម៉ាសច្រើន ដូចនៅថ្ងៃដំបូងដដែល។ ជ័យជម្នះនេះ មិនបានជួយកម្ចាត់ក្រុមហាម៉ាសទេ វាគឺជាវិធីសាស្រ្តខុសទាំងស្រុង។ ដូច្នេះហើយ យើងត្រូវការដំណើរការដ៏ទូលំទូលាយមួយ ហើយយើងកំពុងធ្វើការយ៉ាងហ្មត់ចត់លើដំណោះស្រាយមួយសម្រាប់អនាគត»។ 

នៅក្នុងបទសម្ភាសន៍ជាមួយទូរទស្សន៍ BFMTV ដែលបានចុះផ្សាយមុនជំនួបជាមួយលោក ត្រាំ ប្រធានាធិបតីបារាំងលោក អេម៉ានុយអែល ម៉ាក្រុង បាននិយាយថា មេដឹកនាំអាមេរិក មិនអាចទាមទាររង្វាន់ណូបែលសន្តិភាពបានទេ លុះត្រាំតែលោកបញ្ឈប់ជម្លោះ នៅតំបន់ហ្កាហ្សាស្ទ្រីប។ យោងតាមលោកប្រធានាធិបតីបារាំង សហរដ្ឋអាមេរិក គឺស្ថិតក្នុងទីតាំងល្អបំផុត ដើម្បីប្រើឥទ្ធិពលដោះស្រាយជម្លោះនេះ ខណៈដែលខ្លួន នៅតែបន្តផ្គត់ផ្គង់ដល់អ៊ីស្រាអែលនូវសព្វាវុធ ដែលប្រើប្រាស់ក្នុងប្រតិបត្តិការយោធា នៅតំបន់ហ្កាហ្សាស្ទ្រីប។ លោកបានអំពាវនាវឲ្យទីក្រុងវ៉ាស៊ីនតោន «ដាក់សម្ពាធលើរដ្ឋាភិបាលអ៊ីស្រាអែល» ដើម្បីសម្រេចបាននូវការបញ្ឈប់អរិភាព ការដោះលែងចំណាប់ថ្នូរនៅសេសសល់ ដែលឃុំខ្លួនដោយក្រុមសកម្មប្រយុទ្ធហាម៉ាស និងការបើកច្រករបៀងមនុស្សធម៌៕