បាល់ទាត់៖ ក្រោយដឹងលទ្ធផលនៃការថតស្កេនរបួសរបស់ខ្សែប្រយុទ្ធ ចាន់ វឌ្ឍនាកា បានដាច់សរសៃជង្គង់ខាងស្ដាំ (ACL) វឌ្ឍនាកា អាចធ្វើការវះកាត់នៅប្រទេសថៃនាដើមខែកុម្ភៈខាងមុខ។ នេះបើយោងតាមប្រភពជិតស្និទ្ធកីឡាករស្នូលនៃក្លិបនាគខៀវបឹងកេតរូបនេះ។ ទន្ទឹមជាមួយគ្នាបន្ទាប់ពីទទួលដំណឹងជុំវិញស្ថានភាពរបួសរបស់កីឡាករជម្រើសជាតិកម្ពុជារូបនេះ សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក៏បានឧបត្ថម្ភថវិកាផ្ទាល់របស់សម្ដេចទាំងទ្វេចំនួន ៥ម៉ឺនដុល្លារសម្រាប់ជួយសម្រួលដល់ការព្យាបាលរបស់ វឌ្ឍនាកា ផងដែរ។
នេះបើតាមការបញ្ជាក់របស់ឯកឧត្តម ចាន់ ចេស្ដា ឪពុកបង្កើត ចាន់ វឌ្ឍនាកា។ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទដដែលបានបញ្ជាក់លើបណ្ដាញសង្គមផ្ទាល់ខ្លួន ក្នុងនាមជាឪពុកម្ដាយ និងក្រុមគ្រួសាររបស់ ចាន់ វឌ្ឍនាកា បានសម្ដែងនូវការគោរពថ្លែងអំណរគុណដ៏ជ្រាលជ្រៅបំផុត ចំពោះគុណូបការៈដ៏ថ្លៃថ្លារបស់សម្ដេចតេជោនាយករដ្ឋមន្ដ្រី និងសម្ដេចកិត្តិព្រឹទ្ធបណ្ឌិត ចំពោះការឧបត្ថម្ភថវិកាផ្ទាល់របស់សម្ដេចដ៏ច្រើនសម្រាប់ព្យាបាលកូនប្រុសរបស់ខ្លួន។ ដំណាលគ្នាផងដែរ ចាន់ វឌ្ឍនាកា ផ្ទាល់ក៏បានសម្ដែងនូវការដឹងគុណ និងថ្លែងអំណរអរគុណដ៏ជ្រាលជ្រៅបំផុត ចំពោះទឹកចិត្តដ៏សប្បុរសរបស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។ តាមរយៈការយកចិត្តទុកដាក់ដ៏វិសេសវិសាលរបស់សម្ដេចតេជោចំពោះវិស័យកីឡាកម្ពុជា និងការឧបត្ថម្ភដ៏ថ្លៃថ្លានេះ វឌ្ឍនាកា ប្ដេជ្ញានឹងកាន់តែខិតខំព្យាយាមខ្លាំងឡើងបន្ថែមទៀតដើម្បីបាល់ទាត់កម្ពុជា។
វឌ្ឍនាកា សន្យាថានឹងថែរក្សារាងកាយឲ្យបានល្អ និងព្យាបាលរបួសឲ្យបានសះស្បើយឆាប់រហ័ស ដើម្បីវិលមកជួយក្លិបកីឡាបាល់ទាត់បឹងកេត និងក្រុមបាល់ទាត់ជម្រើសជាតិកម្ពុជាតាមការចង់បានរបស់លោកគ្រូបង្វឹក។ ជាមួយគ្នានោះ វឌ្ឍនាកា ក៏បានបួងសួងវត្ថុស័ក្ដិសិទ្ធទាំងអស់ក្នុងលោកសូមតាមថែរក្សាសម្ដេចតេជោ និងសម្ដេចកិត្តិព្រឹទ្ធបណ្ឌិត ព្រមទាំងបុត្រាបុត្រី និងចៅៗគ្រប់ពេលវេលា សូមប្រកបដោយសុខភាពបរិបូរណ៍ បញ្ញាញាណភ្លឺថ្លា ដើម្បីបន្តដឹកនាំនាវាកម្ពុជាកាន់តែអភិវឌ្ឍន៍រុងរឿងបន្ថែមទៀតផង។ គួរដឹងថា វឌ្ឍនាកា បានរងរបួសដាច់សរសៃជង្គង់ខាងស្ដាំ អំឡុងការប្រកួតពានរង្វាន់លក្ខណៈមិត្តភាពរវាងបឹងកេត និងវិសាខាកាលពីថ្មីៗ។ តាមរយៈរបួសនេះត្រូវបានប្រភពជិតស្និទ្ធនឹង វឌ្ឍនាកា បញ្ជាក់ថា ក្រុមការងារក្លិបកំពុងធ្វើការក្រុមគ្រូពេទ្យនាប្រទេសថៃ ដើម្បីធ្វើការវះកាត់នាដើមខែកុម្ភៈខាងមុខ បន្ទាប់ពីបញ្ចប់ការធ្វើចត្ដាឡីស័កតាមគោលការណ៍របស់ក្រសួងសុខាភិបាលថៃ។ ប៉ុន្ដែបច្ចុប្បន្ន វឌ្ឍនាកា កំពុងស្នាក់នៅជាមួយឪពុកម្ដាយក្រោមការតាមដានយ៉ាងយកចិត្តទុកដាក់ ពីក្រុមគ្រូពេទ្យនៃក្លិបបឹងកេត៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
