តំបន់រដ្ឋបាលពិសេសហុងកុង និងម៉ាកាវរបស់ប្រទេសចិន បានបង្កើនសញ្ញាព្រមានព្យុះទីហ្វុងដល់កម្រិតខ្ពស់បំផុតរបស់ខ្លួននៅព្រឹកថ្ងៃពុធ (២៤ កញ្ញា) នេះ ខណៈព្យុះទីហ្វុង Ragasa កំពុងតែរំកិលទៅជិតតំបន់ដីសណ្តទន្លេភើល (Pearl River) បណ្តាលឱ្យមានការផ្អាកការដឹកជញ្ជូនយ៉ាងទូលំទូលាយទាំងផ្លូវគោក នឹងផ្លូវអាកាស ការបិទសាលារៀន និងប្រតិបត្តិការសង្គ្រោះបន្ទាន់កំពុងដំណើរការ។

ក្រុមសង្កេតអាកាសធាតុហុងកុង បានបង្កើនសញ្ញាព្រមានព្យុះលេខ១០ នៅម៉ោងក្នុងស្រុកជិត ៣ទៀបភ្លឺថ្ងៃពុធ ដោយកម្លាំងខ្យល់បក់យ៉ាងតិច ១១៨គីឡូម៉ែត្រក្នុងមួយម៉ោង ជាមួយនឹងខ្យល់កន្រ្តាក់លើសពី ២២០គីឡូម៉ែត្រក្នុងមួយម៉ោង។ ចំណែកការិយាល័យភូគព្ភសាស្ត្រ និងឧតុនិយមម៉ាកាវវិញ បានធ្វើដូចគ្នានេះនៅថ្ងៃពុធ ដោយចេញការព្រមានខ្ពស់បំផុតរបស់ខ្លួនកម្រិតលេខ១០។

ព្យុះទីហ្វុង Ragasa ដែលជាព្យុះស៊ីក្លូនត្រូពិកដ៏មានឥទ្ធិពលបំផុតរបស់ពិភពលោកនៅឆ្នាំនេះ បានបង្កការខូចខាតលើក្រុងទាំងពីរ ហើយត្រូវបានរំពឹងថានឹងឆ្លងកាត់តំបន់ក្នុងចម្ងាយ ១០០គីឡូម៉ែត្រភាគខាងត្បូងនៃទីក្រុងហុងកុង នៅព្រឹកថ្ងៃពុធ។ អាជ្ញាធរបានព្រមានពីកម្រិតធ្ងន់ធ្ងរ និងហមន្តរាយនៃព្យុះនេះ បើធៀបនឹងព្យុះ "Hato" ឆ្នាំ២០១៧ និង "Mangkhut" ឆ្នាំ២០១៨ ដ៏បំផ្លិចបំផ្លាញ។

ចាប់តាំងពីព្រលឹមថ្ងៃពុធមក ហុងកុងបានផ្អាកសេវាកម្មផ្លូវដែកខាងក្រៅទាំងអស់ ដោយមានផ្លូវដឹកជញ្ជូនក្រោមដីតិចតួចបំផុត និងការលុបចោលជើងហោះហើរទ្រង់ទ្រាយធំ។ នៅម៉ាកាវ រាល់ច្រកឆ្លងកាត់សមុទ្រ និងស្ពានឆ្លងសមុទ្រចំនួន៤ រួមទាំងស្ពានហុងកុង-ជូហៃ-ម៉ាកាវ ត្រូវបានបិទតាំងតែពីល្ងាចថ្ងៃអង្គារមក ហើយការិយាល័យសាធារណៈក៏ត្រូវផ្អាកប្រតិបត្តិការរបស់ពួកគេផងដែរ៕