សេតវិមាន និងអូស្រ្តាលី បាននិយាយកាលពីថ្ងៃអង្គារ (២៣ កញ្ញា) ថា ប្រធានាធិបតីអាមេរិក លោក Donald Trump នឹងជួបជាមួយនាយករដ្ឋមន្ត្រីអូស្ត្រាលី លោក Anthony Albanese នៅថ្ងៃទី២០ ខែតុលា ក្នុងទីក្រុងវ៉ាស៊ីនតោន ដោយកំណត់ការជួបគ្នាលើកដំបូងរវាងសម្ព័ន្ធមិត្តសន្តិសុខទាំងពីរ ចាប់តាំងពីលោក Trump កាន់តំណែងអាណត្តិទីពីរមក។

មេដឹកនាំទាំងពីរមានរឿងជាច្រើនដែលត្រូវពិភាក្សា រួមទាំងគម្រោង AUKUS តម្លៃរាប់ពាន់លានដុល្លារ ដែលក៏ពាក់ព័ន្ធនឹងចក្រភពអង់គ្លេស ក្នុងការផ្តល់ឱ្យអូស្ត្រាលីនូវនាវាមុជទឹកវាយប្រហារដើរដោយថាមពលនុយក្លេអ៊ែរ ដើម្បីទប់ទល់នឹងឥទ្ធិពលដ៏ធំសម្បើមរបស់ចិន នៅឥណ្ឌូប៉ាស៊ីហ្វិក ដែលបច្ចុប្បន្នស្ថិតក្រោមការត្រួតពិនិត្យរបស់មន្ទីរបញ្ចកោណ។

លោក Albanese បានបញ្ជាក់ពីផែនការកិច្ចប្រជុំនេះ ដោយប្រាប់អ្នកយកព័ត៌មាននៅទីក្រុងញូវយ៉ក កាលពីថ្ងៃអង្គារថា "អូស្ត្រាលី និងសហរដ្ឋអាមេរិក គឺជាដៃគូដ៏អស្ចារ្យ ហើយលោករំពឹងថា ជំនួបនោះនឹងមានលក្ខណៈស្ថាបនា"។

អូស្ត្រាលី បានចំណាយប្រហែល ១ពាន់លានដុល្លារ រួចហើយជាផ្នែកនៃការរួមចំណែកគាំទ្រដល់ការពង្រីកទីតាំងផលិតនាវាមុជទឹករបស់អាមេរិក ហើយនៅតែរក្សាជំនឿចិត្តថា គម្រោង AUKUS —ដែលជាសម្ព័ន្ធដៃគូសន្តិសុខត្រីភាគីរវាងអូស្ត្រាលី ចក្រភពអង់គ្លេស និងសហរដ្ឋអាមេរិក— នឹងអាចដំណើរការបាន។ ក្រោមសម្ពាធពីទីក្រុងវ៉ាស៊ីនតោន ឱ្យបង្កើនការចំណាយលើវិស័យការពារជាតិថែមទៀត អូស្ត្រាលីក្នុងខែនេះក៏បានប្រកាសបន្ថែមប្រាក់ ៨ពាន់លានដុល្លារ ដើម្បីពង្រឹងកន្លែងផលិតនាវានៅរដ្ឋ Western Australia សម្រាប់ការថែទាំនាវាមុជទឹក AUKUS ផងដែរ៕