មេដឹកនាំកំពូលរបស់អ៊ីរ៉ង់ លោក Ayatollah Ali Khamenei កាលពីថ្ងៃអង្គារ (២៣ កញ្ញា) បានច្រានចោលជាថ្មីម្ដងទៀតនូវការចរចាដោយផ្ទាល់ជាមួយសហរដ្ឋអាមេរិក ជុំវិញកម្មវិធីនុយក្លេអ៊ែររបស់ទីក្រុងតេអេរ៉ង់ ដែលជំហាននេះទំនងជាបំផ្លាញកិច្ចខិតខំប្រឹងប្រែងចុងក្រោយដើម្បីបញ្ឈប់ការដាក់ទណ្ឌកម្មឡើងវិញរបស់អង្គការសហប្រជាជាតិលើអ៊ីរ៉ង់ ដែលជិតមកដល់។

ការលើកឡើងរបស់លោក Khamenei ទំនងជារារាំងលទ្ធភាពនៃការចរចាណាមួយជាមួយអាមេរិក ដោយប្រធានាធិបតីអ៊ីរ៉ង់ Masoud Pezeshkian ដែលកំពុងនៅទីក្រុងញូវយ៉ក សម្រាប់មហាសន្និបាតអង្គការសហប្រជាជាតិ UNGA។ ដោយឡែក រដ្ឋមន្ត្រីការបរទេសអ៊ីរ៉ង់ លោក Abbas Araghchi ក៏ទៅជួបប្រជុំនៅទីនោះជាមួយអ្នកការទូតមកពីបារាំង អាល្លឺម៉ង់ និងអង់គ្លេស ជុំវិញការដាក់ទណ្ឌកម្មឡើងវិញ ដែលកំណត់នៅថ្ងៃទី២៧ ខែកញ្ញា ហើយចូលជាធរមាននៅថ្ងៃបន្ទាប់ទី២៨ កញ្ញា។

ក្នុងសុន្ទរកថាដែលចាក់ផ្សាយតាមកញ្ចក់ទូរទស្សន៍រដ្ឋអ៊ីរ៉ង់ លោក Khamenei បាននិយាយថា ការពិភាក្សាជាមួយអាមេរិក តំណាងឱ្យ "ផ្លូវទាល់មួយ"។ លោកបន្តថា “អាមេរិកបានប្រកាសលទ្ធផលនៃកិច្ចចរចាជាមុនរួចទៅហើយ នោះគឺការបិទសកម្មភាពនុយក្លេអ៊ែរ និងការចម្រាញ់អ៊ុយរ៉ានីញ៉ូម... បែបនេះមិនមែនជាការចរចាទេ តែជាការបង្ខិតបង្ខំយ៉ាងច្បាស់"។

ទាក់ទងនឹងរឿងនេះ ការិយាល័យការបរទេសអាល្លឺម៉ង់ បាននិយាយបន្ទាប់ពីកិច្ចប្រជុំជាមួយលោក Araghchi ថា បារាំង អាល្លឺម៉ង់ អង់គ្លេស និងសហភាពអឺរ៉ុប ជំរុញអ៊ីរ៉ង់ ឱ្យចាត់វិធានការឆាប់បំផុតដើម្បីដោះស្រាយកង្វល់កម្មវិធីនុយក្លេអ៊ែររបស់ខ្លួន ហើយគួរតែបន្តកិច្ចពិភាក្សាដោយផ្ទាល់ជាមួយអាមេរិក៕