ប្រព័ន្ធផ្សព្វផ្សាយក្នុងស្រុកបានរាយការណ៍នៅថ្ងៃពុធនេះថា អនុរដ្ឋមន្ត្រីការបរទេសរុស្ស៊ីលោក Mikhail Galuzin បានចោទប្រកាន់កម្លាំងនយោបាយមួយចំនួននៅក្នុងសហភាពអឺរ៉ុប (EU) ពីការប៉ុនប៉ងបង្អាក់កិច្ចសន្ទនារវាងទីក្រុងមូស្គូនិងទីក្រុងវ៉ាស៊ីនតោន ដោយដាក់ការចោទប្រកាន់គ្មានមូលដ្ឋានលើប្រទេសរុស្ស៊ី។ នៅក្នុងបទសម្ភាសន៍ជាមួយសារព័ត៌មាន Izvestia របស់រុស្ស៊ី លោក Galuzin បាននិយាយថា អ្វីដែលលោកបានពណ៌នាថាជា «ភាគីសង្រ្គាម» នៅក្នុងសហភាពអឺរ៉ុប គឺកំពុងស្វះស្វែងរកការធ្វើឲ្យអន្តរាយដល់ជំហានជាវិជ្ជមានក្នុងទំនាក់ទំនងរវាងសហរដ្ឋអាមេរិកនិងរុស្ស៊ី រួមទាំងជំនួបកាលពីពេលថ្មីៗនេះរវាងប្រធានាធិបតីរុស្ស៊ី លោក Vladimir Putin និងប្រធានាធិបតីសហរដ្ឋអាមេរិក លោក Donald Trump នៅរដ្ឋ Alaska ដែលផ្តោតសំខាន់លើដំណោះស្រាយនយោបាយ និងផ្នែកការទូតនៃវិបត្តិនៅអ៊ុយក្រែន។ លោក Galuzin បាននិយាយថា «កម្លាំងទាំងនេះ កំពុងព្យាយាមបង្អាក់ដំណើរការ និងទាញសហរដ្ឋអាមេរិកឱ្យទៅខាងពួកគេ។ «ពួកគេកំពុងប្រើវិធីដែលមិនស្មោះត្រង់ ដូចជាការចោទប្រកាន់គ្មានមូលដ្ឋានទៅលើរុស្ស៊ីពីការរំលោភដែនអាកាសរបស់ប្រទេសសម្ព័ន្ធយោធាណាតូ ឬការបញ្ជូនយានដ្រូនចូលទៅក្នុងទឹកដីរបស់ពួកគេ»។ លោក Galuzin បានបញ្ជាក់ថា ការចោទប្រកាន់លើរុស្ស៊ីពីការរំលោភដែនអាកាស គឺជារឿងខ្វះភស្តុតាងដែលអាចជឿទុកចិត្តបាន។ ការលើកឡើងរបស់លោកបានធ្វើឡើងបន្ទាប់ពីមានសេចក្តីថ្លែងការណ៍នាពេលថ្មីៗនេះដោយនាយករដ្ឋមន្ត្រីប្រទេសអេស្តូនី លោក Kristen Michal ដែលបាននិយាយថា ទីក្រុង Tallinn បានស្នើសុំការពិភាក្សាជាមួយសម្ព័ន្ធមិត្តណាតូក្រោមមាត្រាទី៤នៃសន្ធិសញ្ញាអាត្លង់ទិកខាងជើង បន្ទាប់ពីបានអះអាងថាយន្តហោះចម្បាំង MiG-31 របស់រុស្ស៊ីចំនួន៣គ្រឿងបានហោះចូលដែនអាកាសរបស់ប្រទេសអេស្តូនី កាលពីថ្ងៃសុក្រសប្តាហ៍មុន។

ក្រសួងការពារជាតិរុស្ស៊ីបានច្រានចោលការចោទប្រកាន់នេះ ដោយនិយាយថា យន្តហោះបានធ្វើការហោះហើរតាមផែនការពីតំបន់ Karelia ទៅកាន់តំបន់ Kaliningrad ដោយអនុវត្តតាមបទប្បញ្ញត្តិដែនអាកាសអន្តរជាតិ។