ការប៉ះទង្គិចគ្នាផ្នែកយោធា បានកាន់តែខ្លាំងឡើង ក្នុងរយៈពេលប៉ុន្មានថ្ងៃថ្មីៗនេះ រវាងកងកម្លាំងប្រដាប់អាវុធស៊ូដង់ (SAF) និងកងកម្លាំងយោធាប៉ារ៉ាគាំទ្ររហ័ស (RSF) នៅទីក្រុង El Fasher រដ្ឋធានីនៃរដ្ឋ North Darfur នៅភាគខាងលិចប្រទេសស៊ូដង់។

ខណៈពេលដែលកងកម្លាំង RSF បានអះអាងកាលពីថ្ងៃអង្គារថា ខ្លួនបានគ្រប់គ្រងទីតាំងយុទ្ធសាស្ត្រ នៅជិតមូលដ្ឋានយោធាដ៏សំខាន់មួយ កងទ័ពស៊ូដង់ បានប្រកាសថា ខ្លួនបានវាយបកទៅលើការវាយប្រហារទ្រង់ទ្រាយធំ ដោយបញ្ជាក់ថា ស្ថានភាពនៅក្នុងទីក្រុងនេះ គឺ «ត្រូវបានការគ្រប់គ្រងទាំងស្រុង»។

កងកម្លាំងយោធាប៉ារ៉ាគាំទ្ររហ័ស (RSF) កាលពីថ្ងៃអង្គារ បានចេញផ្សាយវីដេអូ នៅលើវេទិកាប្រព័ន្ធផ្សព្វផ្សាយសង្គម X ដែលអះអាងថា យុទ្ធជនរបស់ខ្លួន បានកាន់កាប់ទីតាំងយោធានៅជិតទីបញ្ជាការកងពលធំថ្មើរជើងលេខ៦ ដែលជាមូលដ្ឋានកងទ័ពដ៏សំខាន់ នៅក្នុងទីក្រុង El Fasher។

ទីប្រឹក្សារបស់កងកម្លាំង RSF លោក Mustafa Ibrahim បាននិយាយនៅក្នុងការបង្ហោះនោះថា៖«កងកម្លាំងរបស់យើង បន្តធ្វើឲ្យស្ថានភាពនៅទីតាំងឈរជើងរបស់កងទ័ពស៊ូដង់កាន់តែលំបាកឡើងៗ។ យើងកំពុងរុលចូលទៅមុខជាមួយនឹងការបង្កើនយុទ្ធសាស្ត្រ នៅតំបន់ភាគខាងជើង ភាគខាងកើត និងភាគខាងត្បូងនៃទីក្រុនេះ ហើយក៏បានចូលទៅក្នុងជំរំជនភៀសខ្លួន Abu Shouk»៕