រដ្ឋាភិបាលអេស្ប៉ាញបានផ្ដល់ការអនុម័តកាលពីថ្ងៃអង្គារ (ទី២៣ ខែកញ្ញា) ជុំវិញការហាមឃាត់អាវុធ «ទាំងស្រុង» ចំពោះអ៊ីស្រាអែល ជាផ្នែកមួយនៃកញ្ចប់វិធានការដែលមានគោលបំណងបញ្ឈប់នូវអ្វីដែលលោកនាយករដ្ឋមន្ត្រី Pedro Sanchez ហៅថា «អំពើប្រល័យពូជសាសន៍ នៅតំបន់ហ្កាហ្សា»។

រដ្ឋមន្ត្រីក្រសួងសេដ្ឋកិច្ច លោក Carlos Cuerpo បានឲ្យដឹងនៅក្នុងសន្និសីទសារព័ត៌មានថា ក្រឹត្យ ហាមឃាត់ការនាំចេញទាំងអស់ទៅកាន់ប្រទេសអ៊ីស្រាអែលនូវគ្រឿងយុទ្ធោបករណ៍ និងផលិតផលប្រើប្រាស់បានទាំងស៊ីវិល និងយោធា ឬបច្ចេកវិទ្យា និងការនាំចូលឧបករណ៍ទាំងនោះមកកាន់ប្រទេសអេស្ប៉ាញ។

លោក Cuerpo បាននិយាយថា ក្រឹត្យនេះក៏រារាំងផងដែរ ចំពោះសំណើដឹកកាត់នៃឥន្ធនៈយន្តហោះ ដែលមានលទ្ធភាពប្រើប្រាស់ក្នុងកម្មវិធីយោធា និងហាមឃាត់ការនាំចូលផលិតផលដែលមានប្រភពមកពីទីកន្លែងតាំងទីលំនៅរបស់អ៊ីស្រាអែល នៅក្នុងដែនដីកាន់កាប់ប៉ាឡេស្ទីន ដែលរួមមានទាំងការផ្សាយពាណិជ្ជកម្មផងដែរ។

បន្ទាប់ពីគណៈរដ្ឋមន្ត្រីបានអនុម័តវិធានការនេះ លោក Cuerpo បានប្រាប់សន្និសីទសារព័ត៌មានថា៖ «ក្រឹត្យនេះ គឺជាជំហានដ៏ធំមួយឆ្ពោះទៅមុខ ហើយកំពុងបើកផ្លូវឲ្យមានកម្រិតអន្តរជាតិ ពាក់ព័ន្ធនឹងការហាមឃាត់អាវុធទាំងស្រុង ចំពោះអ៊ីស្រាអែល»។

រដ្ឋាភិបាលបញ្ជាក់ថា ក្រឹត្យនេះ «ត្រូវបញ្ចូលក្នុងច្បាប់ជាធរមាន» នូវការហាមប្រាមលើការលក់ ឬការទិញគ្រឿងយុទ្ធោបករណ៍ជាមួយអ៊ីស្រាអែល ដែលខ្លួនបានអនុវត្តចាប់តាំងពីដើមដំបូងនៃការវាយលុករបស់អ៊ីស្រាអែល នៅតំបន់ហ្កាហ្សា។ ក្រឹត្យនេះនឹងចូលជាធរមានភ្លាមៗ ប៉ុន្តែវានៅតែត្រូវការអនុម័តនាពេលក្រោយដោយសភា ដែលរដ្ឋាភិបាលឆ្វេងនិយមរបស់លោក Sanchez ខ្វះសំឡេងភាគច្រើនដាច់ខាត ហើយបានជួបការលំបាកក្នុងការទទួលបានការអនុម័តច្បាប់នេះ៕