លោក វ្ល៉ូឌីមី ហ្សេឡិនស្គី បាននិយាយនៅក្នុងបទសម្ភាសន៍ជាមួយបណ្តាញទូរទស្សន៍ Fox News ថា អ៊ុយក្រែន អាចរៀបចំការបោះឆ្នោតប្រធានាធិបតីបាន ប្រសិនបើបទឈប់បាញ់ ត្រូវសម្រេចបាន។

នៅពេលត្រូវបានសួរអំពីការកំណត់ពេលការបោះឆ្នោតនោះ លោកបាននិយាយថា៖«យើងត្រូវការសន្តិសុខសម្រាប់ការបោះឆ្នោតទាំងនេះ។ យើងត្រៀមខ្លួនរួចជាស្រេច ប្រសិនបើយើងមានបទឈប់បាញ់ ទោះបីជាវាពិបាកក្នុងការអនុលោមតាមរដ្ឋធម្មនុញ្ញរបស់យើងក៏ដោយ។ យើងអាចធ្វើបាន។ ជាមួយដៃគូរបស់យើង យើងត្រូវការការធានាសន្តិសុខ»។ 

នៅក្នុងប្រទេសអ៊ុយក្រែន ទាំងការបោះឆ្នោតសភា និងការបោះឆ្នោតប្រធានាធិបតី មិនត្រូវបានធ្វើឡើង ដោយសារតែច្បាប់អាជ្ញាសឹក ដែលបានដាក់ចេញនៅថ្ងៃទី ២៤ ខែកុម្ភៈ ឆ្នាំ ២០២២ និងពន្យារពេលជាបន្តបន្ទាប់ទៀត។ ការបោះឆ្នោតសភា ត្រូវបានគ្រោងធ្វើ នៅចុងខែតុលា ឆ្នាំ ២០២៣ និងការបោះឆ្នោតប្រធានាធិបតីសម្រាប់ខែមីនា ឆ្នាំ ២០២៤។ ប្រធានាធិបតីរុស្ស៊ីលោក វ្ល៉ាឌីមៀ ពូទីន (Vladimir Putin) បានចង្អុលបង្ហាញម្តងហើយម្តងទៀតអំពីភាពមិនស្របច្បាប់របស់លោក ហ្សេឡិនស្គី៕