បញ្ហាពន្ធគយដ៏ធ្ងន់របស់សហរដ្ឋអាមេរិកដែលដាក់លើបណ្តាប្រទេសអាស៊ីអាគ្នេយ៍ នឹងលេចឡើងនៅក្នុងកិច្ចប្រជុំ រវាងតំណាងពាណិជ្ជកម្មអាមេរិក លោក Jamieson Greer និងសមភាគី ក្នុងតំបន់ នៅទីក្រុងគូឡាឡាំពួ នាថ្ងៃពុធ (ទី២៤ ខែកញ្ញា) ដែលមានបំណងពិភាក្សា អំពីកិច្ចព្រមព្រៀងពាណិជ្ជកម្ម និងការវិនិយោគ។

បណ្ដាប្រទេសអាស៊ីអាគ្នេយ៍ ពឹងផ្អែកយ៉ាងខ្លាំងលើការនាំចេញ ដើម្បីជំរុញដល់កំណើនសេដ្ឋកិច្ច ហើយមានក្ដីបារម្ភយ៉ាងខ្លាំង អំពីផលប៉ះពាល់នៃពន្ធគយរបស់សហរដ្ឋអាមេរិកដែលត្រូវបានកំណត់នៅកម្រិត ១៩ភាគរយ និង ២០ភាគរយ ចំពោះប្រទេសភាគច្រើនរបស់តំបន់នេះ។

ប្រទេសឡាវ និងសហភាពមីយ៉ាន់ម៉ាបានរងផលប៉ះពាល់ដោយអត្រាពន្ធ ៤០ភាគរយ ខណៈសិង្ហបុរីមានកម្រិត ១០ភាគរយ។

រដ្ឋមន្ត្រីពាណិជ្ជកម្មម៉ាឡេស៊ី លោក Tengku Zafrul Aziz កំពុងធ្វើជាម្ចាស់ផ្ទះទទួលរដ្ឋមន្ត្រីមកពីសមាគមប្រជាជាតិអាស៊ីអាគ្នេយ៍ (ASEAN) ដែលមានសមាជិក ១០ប្រទេស សម្រាប់ជុំនៃកិច្ចពិភាក្សាសេដ្ឋកិច្ច នាសប្តាហ៍នេះ ហើយលោកបាននិយាយថា៖ «មិនថា យើងនឹងពិភាក្សាអំពីអត្រាពន្ធគយ ឬអត់នោះ វាជាអ្វីដែលយើងនឹងបានឃើញ»។

គួរបញ្ជាក់ថា បណ្ដាប្រទេសប្លុកអាស៊ានភាគច្រើន បានបន្តការចរចាដាច់ដោយឡែកជាមួយសហរដ្ឋអាមេរិក ជុំវិញបញ្ហាដំឡើងពន្ធលើទំនិញនាំចូលនេះ៕