នាយករដ្ឋមន្ត្រីវៀតណាម បាននិយាយថា ទីក្រុងហាណូយកំពុងប្រឹងប្រែងស្វែងរកកិច្ចព្រមព្រៀងពាណិជ្ជកម្មថ្មី នៅឆ្នាំនេះ ដើម្បីកាត់បន្ថយផលប៉ះពាល់ ដោយសារអត្រាពន្ធរបស់សហរដ្ឋអាមេរិក ដែលជាទីផ្សារធំបំផុតរបស់ខ្លួន។

ការប្រកាសនេះ បានកើតមានឡើងតែប៉ុន្មានថ្ងៃបន្ទាប់ពីការប៉ាន់ប្រមាណដោយកម្មវិធីអភិវឌ្ឍន៍របស់អង្គការសហប្រជាជាតិ (UN) បានបង្ហាញថា ការដំឡើងពន្ធរបស់សហរដ្ឋអាមេរិក បានបង្កជាហានិភ័យឲ្យមានការធ្លាក់ចុះរហូតដល់ ១ភាគ៥នៃការនាំចេញរបស់វៀតណាមទៅកាន់សហរដ្ឋអាមេរិក ដោយធ្វើឲ្យប្រទេសរងគ្រោះខ្លាំងបំផុត នៅក្នុងតំបន់អាស៊ីអាគ្នេយ៍។

នៅក្នុងសេចក្តីថ្លែងការណ៍មួយដែលត្រូវបានបង្ហោះនៅលើគេហទំព័ររបស់រដ្ឋាភិបាល នាថ្ងៃពុធ (ទី២៤ ខែកញ្ញា) នេះ លោកនាយករដ្ឋមន្ត្រី Pham Minh Chinh បានលើកឡើងថា ការនាំចេញ «នឹងជួបប្រទះការលំបាក និងបញ្ហាប្រឈមនានា ដោយសារតែការប្រកួតប្រជែងជាយុទ្ធសាស្រ្ត ជម្លោះ និងគោលនយោបាយពន្ធបដិការ» របស់សហរដ្ឋអាមេរិក។

លោករំពឹងថា ការនាំចេញនឹងកើនឡើងជាង ១២ភាគរយ នៅឆ្នាំនេះ។ យោងតាមទិន្នន័យរបស់រដ្ឋាភិបាលបានឲ្យដឹងថា ការនាំចេញរបស់វៀតណាមក្នុងឆ្នាំនេះ រហូតដល់ថ្ងៃទី១៥ ខែកញ្ញា បានកើនឡើង ១៥,៨ភាគរយ ធៀបនឹងឆ្នាំមុន ដោយឡើងដល់ចំនួន ៣២៥,៣ពាន់លានដុល្លារ។

លោក Chinh បានបញ្ជាក់ថា ដើម្បីប៉ះប៉ូវផលប៉ះពាល់ ដោយសារកាតព្វកិច្ចពន្ធគយរបស់សហរដ្ឋអាមេរិក វៀតណាមមានគោលបំណងចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយប្លុកពាណិជ្ជកម្ម Mercosur របស់តំបន់អាមេរិកឡាទីន និងបណ្តាប្រទេសក្រុមប្រឹក្សាសហប្រតិបត្តិការឈូងសមុទ្រ នៅចុងឆ្នាំនេះ៕