វិមានក្រឹមឡាំងកាលពីថ្ងៃពុធ បាននិយាយថា ខ្លួនគ្មានជម្រើសអ្វី ក្រៅពីការបន្តការវាយលុកយោធារបស់ខ្លួន លើអ៊ុយក្រែននោះទេ ខណៈដែលទីក្រុងមូស្គូ បានច្រានចោលការអះអាងរបស់ប្រធានាធិបតីអាមេរិកលោក ដូណាល់ ត្រាំ ដែលថា រុស្ស៊ី គឺជា «ខ្លាក្រដាស»។

ការអត្ថាធិប្បាយនេះ កើតឡើងមួយថ្ងៃបន្ទាប់ពីលោក ត្រាំ បាននិយាយថា អ៊ុយក្រែនអាចដណ្តើមយកទឹកដីទាំងអស់របស់ខ្លួនមកវិញពីប្រទេសរុស្ស៊ី ដែលលោកបានចាត់ទុកជា «ខ្លាក្រដាស» ជាមួយនឹងសេដ្ឋកិច្ចដែលកំពុងធ្លាក់ចុះ ដែលជាចំណុចសំខាន់នៅក្នុងជំហររបស់លោកចំពោះជម្លោះរយៈពេលបីឆ្នាំកន្លះនេះ។

អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃពុធថា៖«យើងកំពុងបន្តប្រតិបត្តិការយោធាពិសេសរបស់យើង ដើម្បីធានាផលប្រយោជន៍របស់យើង និងសម្រេចបាននូវគោលដៅ» ដែលកំណត់ដោយប្រធានាធិបតីរុស្ស៊ី លោក វ្ល៉ាឌីមៀ ពូទីន ដោយប្រើពាក្យរបស់ទីក្រុងមូស្គូសម្រាប់ការវាយប្រហាររបស់ខ្លួនលើអ៊ុយក្រែន។

លោកបានបន្ថែមនៅក្នុងបទសម្ភាសន៍តាមវិទ្យុជាមួយកាសែតរុស្ស៊ីថា៖«យើងកំពុងធ្វើការងារនេះសម្រាប់ទាំងបច្ចុប្បន្ន និងអនាគតនៃប្រទេសរបស់យើង៕