ប្រធានាធិបតីទួរគី លោក Recep Tayyip Erdogan បាននិយាយថា កិច្ចប្រជុំ ស្ដីពីតំបន់ហ្កាហ្សា ជាមួយប្រធានាធិបតីអាមេរិក លោក Donald Trump និងបណ្ដាមេដឹកនាំនៃប្រទេសមូស្លីម គឺប្រព្រឹត្តទៅ «ប្រកបដោយផលិតភាព និងវិជ្ជមាន» ដោយលោកបានបង្ហាញក្តីសង្ឃឹមថា លទ្ធផលនឹងផ្ដល់នូវអត្ថប្រយោជន៍។

នៅពីមុខមជ្ឈមណ្ឌល Turkevi Center ក្នុងទីក្រុងញូវយ៉ក សហរដ្ឋអាមេរិក លោក Erdogan បានប្រាប់អ្នកសារព័ត៌មានថា៖ «យើងទើបតែបានបញ្ចប់កិច្ចប្រជុំប្រកបដោយផលិតភាព និងវិជ្ជមាន។ ខ្ញុំពេញចិត្ត ពោលគឺជាជំនួបដែលលទ្ធផលអាចផ្ដល់នូវប្រយោជន៍»។

មេដឹកនាំទាំង២ បានចូលរួមក្នុងកិច្ចប្រជុំថ្នាក់តំបន់ ស្ដីពីវិបត្តិហ្កាហ្សាដែលធ្វើឡើងនៅខាងក្រៅមហាសន្និបាតអង្គការសហប្រជាជាតិលើកទី៨០ នៅទីស្នាក់ការអង្គការសហប្រជាជាតិ (UN)។

នៅពេលត្រូវបានសួរថា តើកិច្ចប្រជុំកំពូលជាមួយលោក Trump អាចនាំឲ្យមានវិធានការជាក់ស្តែងឆ្ពោះទៅរកសន្តិភាព និងការការពារជនស៊ីវិលដែរ ឬយ៉ាងណានោះ លោក Erdogan បានឆ្លើយតបថា សេចក្តីប្រកាសរួមមួយ នឹងត្រូវបានចេញក្នុងពេលឆាប់ៗនេះ។

ចំណែកលោក Trump បានប្រាប់អ្នកសារព័ត៌មានដោយឡែកថា ការជួបជុំនេះ គឺ «ជោគជ័យណាស់» ដោយគូសបញ្ជាក់ពីការចូលរួមរបស់រដ្ឋសំខាន់ៗដែលប្រទេសមូស្លីមភាគច្រើន។ លោក Trump បានប្រាប់ថា៖ «យើងមាននូវកិច្ចប្រជុំដ៏ល្អមួយ ពាក់ព័ន្ធនឹងតំបន់ហ្កាហ្សា»។

យ៉ាងណាក្ដី មិនមានព័ត៌មានលម្អិតបន្ថែម អំពីលទ្ធផលនៃកិច្ចប្រជុំបិទទ្វារនេះ ត្រូវបានផ្តល់ដោយមន្ត្រីនោះឡើយ៕