អ្នករៀបចំនៃកងនាវាផ្ដល់ជំនួយឆ្ពោះទៅតំបន់ហ្កាហ្សា និងសកម្មជនគាំទ្រប៉ាឡេស្ទីន បាននិយាយនៅថ្ងៃពុធ (ទី២៤ ខែកញ្ញា) នេះថា ទូករបស់ពួកគេជាច្រើនគ្រឿងត្រូវបានកំណត់គោលដៅដោយយានដ្រូនជាច្រើនគ្រឿង។

ក្រុមផ្ដល់ជំនួយតាមនាវា Global Sumud Flotilla បានឲ្យដឹងថា ការផ្ទុះជាង ១០ដង ត្រូវបានឮនៅជុំវិញកងនាវាផ្ដល់ជំនួយនេះ ខណៈដែលទូកទាំងនោះបានធ្វើដំណើរចេញពីប្រទេសក្រិក កាលពីល្ងាចថ្ងៃទី២៣ ខែកញ្ញា ដោយបានរងការខូចខាតដោយសារ «វត្ថុមិនស្គាល់ប្រភេទ» ធ្លាក់លើជាន់នាវា។ ក្រុមនេះបានឲ្យដឹងថា «យានដ្រូន និងវត្ថុមិនស្គាល់ប្រភេទ បានធ្លាក់ចុះមក ការទំនាក់ទំនងបានគាំង ហើយការផ្ទុះបានឮពីទូកជាច្រើនគ្រឿង»។

សមាជិកសភាប៉ូឡូញ លោក Franek Sterczewski ដែលជិះលើទូក ១គ្រឿង បានបង្ហោះនៅលើបណ្ដាញសង្គម X ថា មានការវាយប្រហារចំនួន ១៣លើក លើនាវាសរុបចំនួន ១០គ្រឿង ក្នុងនោះរួមទាំងនាវាដែលលោកជិះផងដែរ។ លោកបានបន្ថែមថា៖ «នាវា ៣គ្រឿងត្រូវបានខូចខាត»។

ចំណែកសកម្មជនសិទ្ធិមនុស្សអាល្លឺម៉ង់ និងជាសមាជិកកងនាវាផ្ដល់ជំនួយនេះ គឺលោកស្រី Yasemin Acar បាននិយាយនៅក្នុងវីដេអូដែលនាងបានបង្ហោះនៅលើបណ្ដាញសង្គម Instagram ថា នាវាចំនួន ៥គ្រឿង ត្រូវបានវាយប្រហារ។

យ៉ាងណាក្ដី ឆ្មាំល្បាតឆ្នេរក្រិកបានប្រាប់បណ្ដាញសារព័ត៌មានថា ទូកល្បាតរបស់ទីភ្នាក់ងារព្រំដែនសហភាពអឺរ៉ុប (Frontex) បានចូលទៅក្បែរនាវា ១គ្រឿង ហើយមិនឃើញមានភស្តុតាងបង្ហាញពីការខូចខាតនោះឡើយ។ ស្ត្រីអ្នកនាំពាក្យឆ្មាំល្បាតឆ្នេរបានប្រាប់ថា៖ «បន្ទប់ប្រតិបត្តិការឆ្មាំល្បាតឆ្នេរត្រូវបានជូនដំណឹង អំពីឧបទ្ទវហេតុនេះ ក្រោយម៉ោង ២:៣០នាទីព្រឹក (ម៉ោងក្នុងស្រុក)។

ក្រុមផ្ដល់ជំនួយ Global Sumud Flotilla បានចេញដំណើរពីទីក្រុង Barcelona ប្រទេសអេស្ប៉ាញ កាលពីដើមខែកញ្ញា ក្នុងគោលបំណងទម្លាយការរាំងខ្ទប់របស់អ៊ីស្រាអែល នៅតំបន់ហ្កាហ្សា និងផ្តល់ជំនួយដល់ដែនដីនេះ។ បច្ចុប្បន្ននេះ ក្រុមនេះមាននាវាចំនួន ៥១គ្រឿងដែលភាគច្រើនស្ថិតនៅលើកោះ Crete របស់ក្រិក៕