មន្ត្រីក្រសួងការពារជាតិ នៅថ្ងៃពុធ (ទី២៤ ខែកញ្ញា) នេះ បានឲ្យដឹងថា ក្រសួងការពារជាតិរបស់ប្រទេសកូរ៉េខាងត្បូង និងសមភាគីអាមេរិក បានមានទស្សនៈរួមគ្នាថា វឌ្ឈនភាពគួរឲ្យកត់សម្គាល់ បានកើតឡើង ក្នុងការបំពេញតាមលក្ខខណ្ឌ សម្រាប់ការផ្ទេរការគ្រប់គ្រងប្រតិបត្តិការសម័យសង្គ្រាម។

បច្ចុប្បន្ននេះ សហរដ្ឋអាមេរិកនឹងបញ្ជាកងទ័ពសម្ព័ន្ធមិត្ត ក្នុងករណីផ្ទុះសង្រ្គាមនៅឧបទ្វីបកូរ៉េ ប៉ុន្តែកូរ៉េខាងត្បូង បាននិងកំពុងស្វែងរក ដើម្បីទទួលបាន «ការគ្រប់គ្រងប្រតិបត្តិការ»។

កាលពីថ្ងៃចន្ទ (ទី២៣ ខែកញ្ញា) ប្រធានាធិបតីកូរ៉េខាងត្បូង លោក Lee Jae Myung បានប្តេជ្ញាបញ្ចប់ «ដំណើរវិលចុះឡើងនៃភាពតានតឹងផ្នែកយោធាមិនចាំបាច់» ជាមួយប្រទេសកូរ៉េខាងជើង ក្នុងគោលបំណងសម្រេចបាននូវការរួមរស់ប្រកបដោយសន្តិភាព និងការមានកំណើនរួមគ្នា។

បន្ទាប់ពីមានកិច្ចប្រជុំជាន់ខ្ពស់ នៅទីក្រុងសេអ៊ូល ក្រសួងការពារជាតិកូរ៉េខាងត្បូង បានឲ្យដឹងនៅក្នុងសេចក្តីថ្លែងការណ៍មួយថា ភាគីទាំង២ បានវាយតម្លៃកិច្ចសហប្រតិបត្តិការយោធាជារួម ដើម្បីអភិវឌ្ឍសម្ព័ន្ធភាពឲ្យទៅជាសម្ព័ន្ធភាពមួយចែករំលែកគ្នាទៅវិញទៅមក តម្រង់ទិសអនាគត និងទំនើបកម្ម។ ជាមួយគ្នានេះ ក្រសួងបានបន្ថែមថា ភាគីទាំង២ ក៏បានយល់ព្រមសហការលើវិធានការតាមដាន ចំពោះអ្វីដែលបានពិភាក្សា ក្នុងអំឡុងកិច្ចប្រជុំកំពូលលើកដំបូងកាលពីខែសីហា រវាងមេដឹកនាំនៃប្រទេសទាំង២ ផងដែរ។

យ៉ាងណាក្ដី សេចក្តីថ្លែងការណ៍នេះមិនបានប្រាប់ឲ្យដឹង អំពីបញ្ហានៃការគ្រប់គ្រងប្រតិបត្តិការនោះទេ ប៉ុន្តែមន្ត្រីកូរ៉េខាងត្បូងម្នាក់បានបញ្ជាក់ពីរបាយការណ៍មុនរបស់ទីភ្នាក់ងារសារព័ត៌មាន Yonhap ដែលថា ភាគីទាំង២ បានបង្ហាញទស្សនៈស្របគ្នា នៅក្នុងកិច្ចប្រជុំនោះ៕