សាជីវកម្មនុយក្លេអ៊ែររដ្ឋ Rosatom បានឲ្យដឹងថា នាថ្ងៃពុធ (ទី២៤ ខែកញ្ញា) នេះ រុស្ស៊ី និងអ៊ីរ៉ង់ បានចុះហត្ថលេខាលើអនុស្សរណៈនៃការយោគយល់គ្នា ស្តីពីការសាងសង់រោងចក្រថាមពលនុយក្លេអ៊ែរខ្នាតតូច នៅក្នុងប្រទេសអ៊ីរ៉ង់។

កិច្ចព្រមព្រៀងនេះត្រូវបានចុះហត្ថលេខា ដោយប្រធានក្រុមហ៊ុន Rosatom លោក Alexei Likhachev និងមន្ត្រីនុយក្លេអ៊ែរជាន់ខ្ពស់របស់អ៊ីរ៉ង់ លោក Mohammad Eslami ក្នុងកិច្ចប្រជុំនៅទីក្រុងមូស្គូ។ ក្រុមហ៊ុន Rosatom បានពិពណ៌នាថា វាជា «គម្រោងយុទ្ធសាស្ត្រ»

កាលពីដើមសប្តាហ៍នេះ លោក Eslami ដែលជាអនុប្រធានាធិបតីអ៊ីរ៉ង់ បានប្រាប់ប្រព័ន្ធផ្សព្វផ្សាយរដ្ឋអ៊ីរ៉ង់ថា ផែនការនេះ គឺដើម្បីសាងសង់រោងចក្រថាមពលនុយក្លេអ៊ែរចំនួន ៨ ខណៈដែលទីក្រុងតេអេរ៉ង់ស្វែងរកការឈានដល់កម្រិត ២០ជីហ្គាវ៉ាត់ (GW) នៃសមត្ថភាពថាមពលនុយក្លេអ៊ែរ នៅឆ្នាំ២០៤០។

អ៊ីរ៉ង់ដែលខ្វះខាតអគ្គិសនី ក្នុងកំឡុងខែដែលមានតម្រូវការខ្ពស់នោះ មានរោងចក្រថាមពលនុយក្លេអ៊ែរតែមួយគត់ ដែលដំណើរការនៅក្នុងទីក្រុង Bushehr ភាគខាងត្បូង។ រោងចក្រនោះត្រូវបានសាងសង់ដោយរុស្ស៊ី ហើយមានសមត្ថភាពផលិតបានប្រហែល ១ជីហ្គាវ៉ាត់។

រុស្ស៊ីមានទំនាក់ទំនងជិតស្និទ្ធជាមួយអ៊ីរ៉ង់ ហើយបានថ្កោលទោសការវាយប្រហាររបស់អាមេរិក និងអ៊ីស្រាអែលលើទីតាំងនុយក្លេអ៊ែរអ៊ីរ៉ង់ កាលពីដើមឆ្នាំនេះ ដែលត្រូវបានធ្វើឡើង ក្នុងគោលបំណងរារាំងទីក្រុងតេអេរ៉ង់មិនឲ្យផលិតបានគ្រាប់បែកនុយក្លេអ៊ែរ។ អ៊ីរ៉ង់លើកឡើងដដែលៗថា ខ្លួនមិនមានចេតនាផលិតអាវុធបែបនេះឡើយ៕