ប្រភពបានប្រាប់សារព័ត៌មានរ៉យទ័រថា យ៉ាងហោចណាស់មនុស្ស ៤នាក់ បានបាត់បង់ជីវិត និងរាប់សិបនាក់ទៀត បានរងរបួស នៅតំបន់ហិមាល័យ Ladakh របស់ប្រទេសឥណ្ឌា នាថ្ងៃពុធ (ទី២៤ ខែកញ្ញា) នេះ ខណៈដែលក្រុមអ្នកតវ៉ាទាមទារភាពជារដ្ឋ សម្រាប់ដែនដីសហព័ន្ធ និងកូតាការងារ សម្រាប់អ្នកស្រុកមូលដ្ឋាន បានប៉ះទង្គិចជាមួយនគរបាល។

តំបន់ដែលមានទាំងពុទ្ធបរិស័ទ និងសាសនិកមូស្លីម បានបាត់បង់ស្វ័យភាពរបស់ខ្លួន នៅឆ្នាំ២០១៩ នៅពេលដែលវាត្រូវបានកាត់ចេញពីរដ្ឋ Jammu និង Kashmir ដោយរដ្ឋាភិបាលរបស់លោកនាយករដ្ឋមន្ត្រី Narendra Modi ហើយដាក់ឲ្យស្ថិតនៅក្រោមការគ្រប់គ្រងផ្ទាល់របស់ទីក្រុង New Delhi។

ក្រុមបាតុករដែលដឹកនាំដោយសកម្មជន លោក Sonam Wangchuk ក៏ចង់ឲ្យតំបន់ Ladakh នេះ ទទួលបានឋានៈពិសេស ដែលនឹងអនុញ្ញាតឲ្យមានការបង្កើតស្ថាប័នជាប់ឆ្នោត ក្នុងតំបន់ ដើម្បីការពារតំបន់កុលសម្ព័ន្ធរបស់ខ្លួន។

ទីភ្នាក់ងារសារព័ត៌មាន ANI ដែលសារព័ត៌មាន Reuters មានភាគហ៊ុនភាគតូច បានរាយការណ៍ថា ការិយាល័យគណបក្ស Bharatiya Janata របស់លោក Modi នៅក្នុងទីក្រុងសំខាន់ Leh ស្ថិតក្នុងចំណោមអគារដែលត្រូវបានបំផ្លិចបំផ្លាញ និងដុតបំផ្លាញ។

រូបភាពពីប្រព័ន្ធផ្សេព្វផ្សាយ ANI បានបង្ហាញឲ្យឃើញផ្សែងខ្មៅហុយទ្រលោមចេញពីជញ្ជាំងនៃការិយាល័យ និងកន្លែងផ្សេងទៀតដែលមនុស្សរាប់រយនាក់បានស្រែកពាក្យស្លោកផ្សេងៗ។

ប៉ុស្តិ៍ទូរទស្សន៍ឥណ្ឌា បានផ្សាយពីរូបភាពរថយន្តនគរបាលត្រូវបានបោះបង់ចោល ដែលមានអណ្តាតភ្លើងឆាបឆេះចេញពីខាងមុខ។ ហើយសេចក្ដីរាយការណ៍ពីប្រព័ន្ធផ្សព្វផ្សាយក្នុងស្រុកដទៃទៀត បានឲ្យដឹងថា ក្រុមបាតុករវ័យក្មេងមួយចំនួន បានគប់ដុំថ្មទៅលើនគរបាល ហើយឧស្ម័នបង្ហូរទឹកភ្នែកត្រូវបានប្រើប្រាស់ដើម្បីបំបែកពួកគេ។ ប្រភពនគរបាលមួយ បានបង្ហើបឲ្យដឹងថា មនុស្សជាង ៥០នាក់ ក្នុងនោះមានទាំងនគរបាល ២០នាក់ បានរងរបួស។

ការិយាល័យរបស់អភិបាលរងតំបន់ Ladakh និងនគរបាល មិនបានឆ្លើយតបភ្លាមៗនោះឡើយ ទៅនឹងសំណើសុំការអត្ថាធិប្បាយរបស់សារព័ត៌មាន Reuters។ អ្នកគ្រប់គ្រងមូលដ្ឋាន លោក Romil Singh Donk បានឲ្យដឹងនៅក្នុងសេចក្តីជូនដំណឹងជាសាធារណៈមួយថា បាតុកម្ម ការជួបជុំជាសាធារណៈ និងការនិយាយអុចអាល កំពុងត្រូវបានហាមឃាត់ ដើម្បីរក្សាសន្តិភាព៕