ខេត្តក្វាងទុងនៅភាគខាងត្បូងប្រទេសចិន កំពុងធូរស្រាលឡើងវិញពីការថយចុះកម្លាំងនៃព្យុះទីហ្វុង Ragasa ដែលបានបោកបក់លើទីក្រុង Yangjiang កាលពីថ្ងៃពុធសប្ដាហ៍នេះ ដែលបណ្តាលឱ្យមានទឹកជំនន់ធ្ងន់ធ្ងរ និងការខូចខាតយ៉ាងច្រើន។

នៅក្នុងស្រុក សៀងចូវ (Xiangzhou) នៃទីក្រុង ជូហៃ (Zhuhai) ក្រុមអ្នកពន្លត់អគ្គិភ័យបានជម្លៀសអ្នកស្រុក វ័យចំណាស់ចេញពីភូមិមួយដែលត្រូវបានគំរាមកំហែងដោយការជ្រាបចូលនៃទឹកសមុទ្រ និងទឹកជំនន់ទៅកាន់ជម្រកសុវត្ថិភាព។

ព្យុះទីហ្វុងនេះ ក៏បាននាំមកនូវខ្យល់បក់ខ្លាំងទៅកាន់ទីក្រុង ឈិនជិន (Shenzhen)ផងដែរ ដោយបានរំលើងដើមឈើធំៗជាច្រើនបណ្ដាលឲ្យបិទផ្លូវ និងខូចខាតយានយន្តដែលចតនៅចិញ្ចើមផ្លូវ។ ក្រុមអ្នកពន្លត់អគ្គិភ័យបានប្រើរណាកាត់ដើមឈើដែលដួលរលំ បោសសម្អាតកម្ទេចកម្ទី និងស្តារផ្លូវឡើងវិញ។

នៅពេលដែលព្យុះទីហ្វុងបានចុះខ្សោយទៅជាព្យុះត្រូពិកធ្ងន់ធ្ងរបន្ទាប់ពីម៉ោង ១៤ កាលពីថ្ងៃពុធ ទីក្រុងជូហៃ បានបន្ទាបការព្រមានអំពីព្យុះទីហ្វុងរបស់ខ្លួនទៅជាពណ៌លឿងទុំ ហើយបានលុបចោលផ្អាកទូទាំងទីក្រុងលើការងារ អាជីវកម្ម ទីផ្សារ ការដឹកជញ្ជូន និងបើកសាលារៀនឡើងវិញ។ ពេលនេះក្រុមជួសជុលកំពុងស្តារបណ្ដាញថាមពល ទឹក ទូរគមនាគមន៍ និងសម្អាតកម្ទេចកម្ទី។  

បណ្តាញដឹកជញ្ជូនកំពុងដំណើរការឡើងវិញជាបណ្តើរៗ។ គិតត្រឹមព្រឹកថ្ងៃព្រហស្បតិ៍នេះ ខ្សែរថភ្លើងល្បឿនលឿន រួមមាន រដ្ឋធានីប៉េកាំង-ក្វាងចូវ ក្វាងចូវ-ឈិនជិន-ហុងកុង និងហាំងចូវ-ឈិនជិន បានដំណើរការឡើងវិញជាបន្តបន្ទាប់។ ផ្លូវរថភ្លើងអន្តរក្រុង ក្វាងចូវ-ជូហៃ បានបើកដំណើរការឡើងវិញនៅម៉ោង៨ហើយរថភ្លើងល្បឿនលឿននៅលើកោះHainan ចាប់ផ្តើមឡើងវិញនៅម៉ោង ១១។

គម្រោងហេដ្ឋារចនាសម្ព័ន្ធសំខាន់ៗក៏បានបន្តការសាងសង់ឡើងវិញដែរ។ចំណែកស្ពានតភ្ជាប់ពីទីក្រុងហុងកុង -ជូហៃ -ម៉ាកាវ ក៏បានបើកឡើងវិញផងដែរកាលពីថ្ងៃពុធ៕