អាជ្ញាធរបាននិយាយថា កុមារជាង ១.០០០នាក់ នៅតំបន់កោះជ្វាខាងលិច (West Java) របស់ឥណ្ឌូនេស៊ី បានពុលអាហារជាថ្មីម្ដងទៀតនៅសប្តាហ៍នេះ ដោយសារទទួលទានអាហារថ្ងៃត្រង់នៅសាលារៀន ដែលជាជំហានថយក្រោយមួយទៀតសម្រាប់កម្មវិធីអាហារឥតគិតថ្លៃ មានតម្លៃរាប់ពាន់លានដុល្លាររបស់លោកប្រធានាធិបតី Prabowo Subianto។

លោក Dedi Mulyadi អភិបាលខេត្តជ្វាខាងលិច បានប្រាប់សារព័ត៌មានរ៉យទ័រ នៅថ្ងៃព្រហស្បតិ៍ (២៥ កញ្ញា) នេះថា ការពុលអាហារទ្រង់ទ្រាយធំត្រូវបានរាយការណ៍ក្នុងតំបន់ចំនួន៤ នៃខេត្តនេះ ខណៈអង្គការមិនមែនរដ្ឋាភិបាល បានចេញការអំពាវនាវឱ្យផ្អាកកម្មវិធីនេះ ដោយសារតែក្ដីបារម្ភពីសុខភាព។

លោក Mulyadi និយាយថា សិស្សជាង ៤៧០នាក់ បានឈឺនៅតំបន់ភាគខាងលិច Bandung កាលពីថ្ងៃចន្ទ បន្ទាប់ពីការញ៉ាំអាហារថ្ងៃត្រង់នៅសាលា ហើយក៏មានករណីដូចគ្នាចំនួន ៣ទៀតបានកើតឡើងនៅទីនោះកាលពីថ្ងៃពុធ និងនៅក្នុងតំបន់ Sukabumi ដែលប៉ះពាល់ដល់កុមារយ៉ាងតិច ៥៨០នាក់។

ករណីចុងក្រោយនេះបានកើតឡើង បន្ទាប់ពីសិស្ស ៨០០នាក់ បានពុលអាហារថ្ងៃត្រង់របស់សាលាមួយកន្លែងកាលពីសប្តាហ៍មុន ក្នុងខេត្ត ជ្វាខាងលិច និង Sulawesi ភាគកណ្ដាល ដែលផ្គត់ផ្គង់ក្រោមកម្មវិធីអាហារឥតគិតថ្លៃដ៏ល្បីល្បាញរបស់លោក Prabowo។ នៅមុនពេលមានឧបទ្ទវហេតុសប្តាហ៍នេះ បណ្ដាញឃ្លាំមើលការអប់រំនៅឥណ្ឌូនេស៊ី បាននិយាយថា មានកុមារលើសពី ៦.៤០០នាក់ នៅទូទាំងប្រទេស បានពុលអាហារក្រោមកម្មវិធីនេះ ចាប់តាំងពីការដំណើរការនៅក្នុងខែមករាមក៕