អង្គការសហប្រជាជាតិបាននិយាយថា ជនភៀសខ្លួនស៊ីរីចំនួន១លាននាក់ បានវិលត្រឡប់ទៅកាន់ប្រទេសរបស់ពួកគេវិញចាប់តាំងពីការដួលរលំរបបមេដឹកនាំលោក Bashar al-Assad កាលពីខែធ្នូ ឆ្នាំមុន ខណៈព្រមានថាការផ្តល់មូលនិធិសម្រាប់ប្រតិបត្តិការមនុស្សធម៌កំពុងធ្លាក់ចុះ។

ទីភ្នាក់ងារជនភៀសខ្លួនរបស់អង្គការសហប្រជាជាតិ (UNHCR) បាននិយាយនៅក្នុងសេចក្តីថ្លែងការណ៍ថា «ក្នុងរយៈពេលត្រឹមតែ៩ខែ ប្រជាជនស៊ីរីមួយលាននាក់បានវិលត្រឡប់ទៅកាន់ប្រទេសរបស់ពួកគេវិញបន្ទាប់ពីការដួលរលំនៃរដ្ឋាភិបាល លោក Bashar al-Assad កាលពីថ្ងៃទី៨ ខែធ្នូ ឆ្នាំ ២០២៤»។

ទីភ្នាក់ងារនេះបាននិយាយបន្ថែមថាមនុស្ស១,៨លាននាក់បានជម្លៀសខ្លួនតែនៅក្នុងប្រទេសស៊ីរីក្នុងអំឡុងពេលជិត១៤ឆ្នាំនៃសង្រ្គាមស៊ីវិលក៏បានវិលត្រឡប់ទៅតំបន់ដើមរបស់ខ្លួនវិញផងដែរ។ ស្ទើរតែពាក់កណ្តាលនៃចំនួនប្រជាជននៅមុនពេលសង្គ្រាមរបស់ប្រទេសស៊ីរីចំនួន១៣លាននាក់ត្រូវបានភៀសខ្លួនចេញដោយជម្លោះដែលបានចាប់ផ្តើមបន្ទាប់ពីការបង្ក្រាបរបស់របបលោក Assad លើការតវ៉ាប្រឆាំងរដ្ឋាភិបាលដោយសន្តិវិធី ជាផ្នែកមួយនៃការតវ៉ានិទាឃរដូវអារ៉ាប់ក្នុងឆ្នាំ២០១១។ ខណៈពិពណ៌នាអំពីការវិលត្រឡប់ទៅវិញទ្រង់ទ្រាយធំនេះថាជា «សញ្ញានៃក្តីសង្ឃឹមដ៏ធំធេង និងការរំពឹងទុកខ្ពស់ ប្រជាជនស៊ីរីបានធ្វើតាមការផ្លាស់ប្តូរនយោបាយនៅក្នុងប្រទេស» ដែលទីភ្នាក់ងារ UNHCR បាននិយាយថា ភាគច្រើននៃអ្នកដែលវិលត្រឡប់ទៅវិញកំពុងតស៊ូដើម្បីកសាងជីវិតរបស់ពួកគេឡើងវិញ។ ទីភ្នាក់ងារនេះបាននិយាយថា «ការបំផ្លាញលំនៅឋាននិងហេដ្ឋារចនាសម្ព័ន្ធ សេវាជាមូលដ្ឋានចុះខ្សោយ និងរងការបំផ្លាញ កង្វះឱកាសការងារ និងសន្តិសុខដែលផុយស្រួយ កំពុងប្រឈមនឹងការប្តេជ្ញាចិត្តរបស់ប្រជាជនក្នុងការវិលត្រឡប់ និងស្តារឡើងវិញ»។ យោងតាមអង្គការ UNHCR បានឲ្យដឹងថា ពលរដ្ឋស៊ីរីជាង៧លាននាក់នៅតែភៀសខ្លួននៅខាងក្នុងប្រទេស ហើយជាង៤,៥លាននាក់កំពុងនៅក្រៅប្រទេស។ វាបានជំរុញឱ្យមានការវិនិយោគកាន់តែច្រើននៅក្នុងកិច្ចខិតខំប្រឹងប្រែងរក្សាស្ថិរភាព និងបង្កើនការគាំទ្រសម្រាប់គ្រួសារដែលងាយរងគ្រោះ។