កំពង់ស្ពឺ៖ ក្រុមការងារសាងសង់កីឡដ្ឋានកំពង់ស្ពឺ ស្ថិតក្នុងក្រុងច្បារមន ខេត្តកំពង់ស្ពឺ បានផ្តល់ព័ត៌មានជូនឯកឧត្តម ហ៊ុន ម៉ានី តំណាងរាស្រ្តមណ្ឌលកំពង់ស្ពឺថា គិតត្រឹមព្រឹកថ្ងៃទី២៩ ខែមករា ឆ្នាំ២០២២នេះ កីឡដ្ឋានកំពង់ស្ពឺ សម្រេចការសាងសង់បានប្រមាណ៧០ភាគរយហើយ។

ព្រឹកនេះក្រុមការងារ ក៏កំពុងត្រៀមតម្លើងបង្គោលភ្លើងធំៗចំនួន៤បង្គោលនៅជុំវិញទីលានបាល់ទាត់ ជាមួយសកម្មភាពសាងសង់ផ្សេងៗទៀតយ៉ាងសកម្ម ស្របតាមប្រព័ន្ធបច្ចេកទេស​កម្រិត​ស្តង់ដារខ្ពស់។

តាមរយៈគំនិត​ផ្តួចផ្តើម​ជាមួយក្រុមការងារកន្លងមក ឯកឧត្តម ហ៊ុន ម៉ានី ជឿជាក់ថា កីឡដ្ឋាន​ខេត្តកំពង់ស្ពឺ ​ដែលមានទីតាំងស្ថិតនៅក្នុងភូមិតាម៉ុល សង្កាត់ច្បារមន​ ក្រុងច្បារមន គឺជាក្តី​សង្ឃឹម​ថ្មីមួយទៀត នៃវិស័យកីឡារបស់ខេត្តកំពង់ស្ពឺ ជាពិសេសការត្រៀមខ្លួនរបស់កម្ពុជា​ក្នុង​ការធ្វើជា​ម្ចាស់ផ្ទះកីឡាអាស៊ីអាគ្នេយ៍ SEAGAME ឆ្នាំ២០២៣ និងព្រឹត្តិការណ៍កីឡាផ្សេងៗទៀត។ បងប្អូនប្រជាពលរដ្ឋនៅក្នុងខេត្ត ​និងតំបន់ជុំវិញ នឹងទទួលបានសមិទ្ធផលថ្មី​មួយ​ក្នុងពេលឆាប់ៗនេះ។

ឆ្លៀតក្នុងឱកាសនេះ ឯកឧត្តម ហ៊ុន ម៉ានី សូមកោត​សរសើរ ​និងអរគុណដល់សប្បុរជន ក៏ដូចជា​ការ​ខិតខំ​ប្រឹងប្រែង​ជាបន្តបន្ទាប់របស់ថ្នាក់ដឹកនាំខេត្ត និង​ជាពិសេសក្រុមការងារបច្ចេកទេស​សាងសង់​យ៉ាងស្រស្រាក់សស្រាំ បើទោះបីជាយើងកំពុងតែឆ្លងកាត់ការ​លំបាក​ក្នុងបរិបទ​នៃការរីករាលដាល​នៃជំងឺកូវីដ-១៩ក៏ដោយ៕