ប្រធានាធិបតីអ៊ីរ៉ង់លោក Masoud Pezeshkian បានថ្លែងទៅកាន់មហាសន្និបាតអង្គការសហប្រជាជាតិថា ទីក្រុងតេអេរ៉ង់នឹង «មិនស្វែងរកការផលិតគ្រាប់បែកនុយក្លេអ៊ែរទេ» ខណៈកិច្ចខិតខំប្រឹងប្រែងផ្នែកការទូតកំពុងដំណើរការដើម្បីបញ្ចៀសនូវអ្វីដែលហៅថាទណ្ឌកម្មក្នុងការអនុវត្តវិធានការដើមលើទីក្រុងតេអេរ៉ង់ ជុំវិញកម្មវិធីនុយក្លេអ៊ែររបស់ប្រទេស។

ការថ្លែងលើកឡើងកាលពីថ្ងៃពុធ ធ្វើឡើងនៅពេលដែលដំណើរការរយៈពេល៣០ថ្ងៃដែលបានចាប់ផ្តើមដោយចក្រភពអង់គ្លេស បារាំង និងអាល្លឺម៉ង់ ដើម្បីចាប់ផ្តើមឡើងវិញនូវទណ្ឌកម្មរបស់អង្គការសហប្រជាជាតិប្រឆាំងនឹងអ៊ីរ៉ង់ ដែលជិតដល់ថ្ងៃផុតកំណត់នៅថ្ងៃទី២៧ ខែកញ្ញា។

ប្រទេសមហាអំណាចអឺរ៉ុបទាំងបី ដែលគេស្គាល់ថា E3 បានចោទប្រកាន់ទីក្រុងតេអេរ៉ង់ពីការខកខានមិនបានអនុវត្តតាមកិច្ចព្រមព្រៀងឆ្នាំ២០១៥ ជាមួយប្រទេសមហាអំណាចពិភពលោកក្នុងគោលបំណងរារាំងប្រទេសនេះពីការផលិតអាវុធនុយក្លេអ៊ែរ។

ប្រទេសE3 បាននិយាយថាពួកគេនឹងពន្យារពេលការដាក់ទណ្ឌកម្មឡើងវិញរហូតដល់៦ខែ ប្រសិនបើអ៊ីរ៉ង់ស្តារដំណើរការទទួលយកក្រុមអធិការកិច្ចនុយក្លេអ៊ែររបស់អង្គការសហប្រជាជាតិ ដោះស្រាយការព្រួយបារម្ភអំពីឃ្លាំងផ្ទុកសារធាតុអ៊ុយរ៉ានីញ៉ូមដែលចម្រាញ់រួច និងចូលរួមកិច្ចចរចាជាមួយសហរដ្ឋអាមេរិក។

ប្រធានាធិបតីបារាំង លោក Emmanuel Macron បានសរសេរនៅលើបណ្តាញ X បន្ទាប់ពីជួបជាមួយ លោក Pezeshkian នៅអង្គការសហប្រជាជាតិថា «កិច្ចព្រមព្រៀងមួយនៅតែអាចធ្វើទៅបាន។ វាអាស្រ័យលើប្រទេសអ៊ីរ៉ង់ក្នុងការឆ្លើយតបទៅនឹងបញ្ហាស្របច្បាប់ដែលយើងបានលើកឡើង»។