យោធាអ៊ីស្រាអែល បានប៉ាន់ប្រមាណកាលពីថ្ងៃទី២៣ ខែកញ្ញា ថា មនុស្សជាង ៦៤០.០០០នាក់ បានជម្លៀសចេញពីទីក្រុងហ្កាហ្សា នៅពេលដែលការវាយលុករបស់អ៊ីស្រាអែល បន្តកើនឡើងកាន់តែកម្រោលនៅតំបន់ភាគខាងជើងនៃដែនដីហ្កាហ្សាស្រ្ទីប។

ការវាយលុក ដែលអ៊ីស្រាអែលដាក់ឈ្មោះថា ប្រតិបត្តិការ Gideon's Chariots II ត្រូវបានអនុម័តក្នុងខែសីហា ហើយកាន់តែខ្លាំងក្លានៅពាក់កណ្តាលខែកញ្ញានេះ ជាពេលដែលយោធាអ៊ីស្រាអែល IDF ពង្រីកប្រតិបត្តិការក្នុងផ្នែកចំនួន៣ នៅក្រុងហ្កាហ្សា។ យោធាបានអំពាវនាវឱ្យប្រជាជនប៉ាឡេស្ទីន ចាកចេញពីកណ្តាលទីក្រុង និងតំបន់ជុំវិញនោះកាលពីខែមុន ហើយនៅត្រឹមថ្ងៃទី១៧ ខែសីហា IDF ប៉ាន់ប្រមាណថា មនុស្ស ៣៥០.០០០នាក់ បានជម្លៀសចេញពីទីក្រុងហ្កាហ្សា ឆ្ពោះទៅភាគខាងត្បូង ទៅកាន់តំបន់ឆ្ងាយពីការប្រយុទ្ធ។

នៅថ្ងៃទី២៤ ខែកញ្ញា នាយសេនាធិការ IDF លោក Eyal Zamir បានអំពាវនាវដល់អ្នករស់នៅក្នុងតំបន់ហ្កាហ្សា ឱ្យ "ក្រោកឡើងហើយបំបែកខ្លួនចេញពីក្រុមហាម៉ាស។ លោកបន្តថា សង្រ្គាម និងការរងទុក្ខនឹងបញ្ចប់ ប្រសិនបើក្រុមហាម៉ាស ដោះលែងចំណាប់ថ្នូរ និងព្រមទម្លាក់អាវុធ។

អ៊ីស្រាអែលបានទទូចជាយូរមកហើយថា ដើម្បីបញ្ចប់សង្រ្គាម ក្រុមហាម៉ាសត្រូវតែដោះលែងចំណាប់ថ្នូរទាំងអស់ រំសាយអាវុធ និងមិនអាចតួនាទីក្នុងការគ្រប់គ្រងតំបន់ហ្កាហ្សា ពេលអនាគតបានឡើយ។ ក្រុមហាម៉ាស និយាយថា ខ្លួននឹងមិនទម្លាក់អាវុធនោះទេ ប៉ុន្តែនឹងព្រមដោះលែងចំណាប់ថ្នូរទាំងអស់ ប្រសិនបើអ៊ីស្រាអែល ព្រមបញ្ចប់សង្រ្គាម ហើយដកកម្លាំងចេញពីតំបន់ហ្កាហ្សា៕