ក្នុងការបើកទំព័រប្រវត្តិសាស្រ្តអស់ជាច្រើនទសវត្សរ៍ ប្រទេសស៊ីរី អាចមានប្រធានាធិបតីមួយរូបឡើងថ្លែងទៅកាន់មហាសន្និបាតអង្គការសហប្រជាជាតិ UNGA កាលពីថ្ងៃពុធ (២៤ កញ្ញា) ដោយជាលើកទីមួយហើយដែលមេដឹកនាំស៊ីរី អាចធ្វើដូច្នេះបានក្នុងពេលជិត ៦០ឆ្នាំមកនេះ។

អំឡុងសុន្ទរកថាររបស់លោក Ahmad al-Sharaa ប្រជាជនស៊ីរីរាប់រយនាក់ប្រមូលផ្ដុំគ្នាគ្រវីទង់ជាតិរបស់ប្រទេសនៅមុខអេក្រង់ធំៗក្នុងទីក្រុង និងទីប្រជុំជនស៊ីរី ដើម្បីធ្វើជាសាក្សីក្នុងការថ្លែងសុន្ទរកថាជាប្រវត្តិសាស្រ្ត។ លោក Al-Sharaa បានប្រាប់សហគមន៍អន្តរជាតិថា៖ បន្ទាប់ពី ៦ទសវត្សរ៍នៃរបបដ៏ឃោរឃៅដែលសម្លាប់មនុស្ស ១លាននាក់ និងទារុណកម្មមនុស្សរាប់សែននាក់ ពេលនេះ “ស៊ីរី កំពុងដណ្តើមតំណែងត្រឹមត្រូវរបស់ខ្លួនឡើងវិញក្នុងចំណោមប្រជាជាតិនានានៃពិភពលោក”។

លោក Al-Sharaa បានក្លាយជាប្រមុខរដ្ឋស៊ីរីដំបូងគេដែលថ្លែងនៅអង្គការសហប្រជាជាតិ ចាប់តាំងពីសុន្ទរកថារបស់លោក Noureddine Attasi ក្នុងឆ្នាំ១៩៦៧មក ភ្លាមៗបន្ទាប់ពីសង្រ្គាមអារ៉ាប់-អ៊ីស្រាអែល នៅក្នុងអំឡុងពេលដែលទីក្រុងដាម៉ាស បានបាត់បង់ការគ្រប់គ្រងលើតំបន់ខ្ពង់រាប Golan ទៅក្នុងដៃអ៊ីស្រាអែល។

ចាប់តាំងពីក្រុមគ្រួសារ Assad ឡើងកាន់អំណាចក្នុងស៊ីរី នៅឆ្នាំ១៩៧០ ក្នុងរដ្ឋប្រហារដ៏បង្ហូរឈាមមួយដែលផ្តួលរំលំលោក Attasi ទំនាក់ទំនងជាមួយសហរដ្ឋអាមេរិកមានភាពតានតឹង ដោយសារទីក្រុងដាម៉ាសធ្លាប់ជាសម្ព័ន្ធមិត្តរបស់អតីតសហភាពសូវៀត។ ក្នុងពេលជាច្រើនទសវត្សរ៍កន្លងមកនេះ រដ្ឋមន្ត្រីការបរទេសស៊ីរី បានធ្វើជាអ្នកតំណាងប្រទេស នៅក្នុងមហាសន្និបាតអង្គការសហប្រជាជាតិ៕