រដ្ឋមន្ត្រីបង្រួបបង្រួមរបស់កូរ៉េខាងត្បូង នៅថ្ងៃព្រហស្បតិ៍ (ទី២៥ ខែកញ្ញា) បាននិយាយថា កូរ៉េខាងជើងត្រូវបានគេជឿថា មានសារធាតុអ៊ុយរ៉ានីញ៉ូមចម្រាញ់កម្រិតខ្ពស់រហូតដល់ ២តោន។

យោងតាមក្រសួងការពារជាតិកូរ៉េខាងត្បូង បានឲ្យដឹងថា កូរ៉េខាងជើងត្រូវបានគេដឹងជាយូរមកហើយថា មានបរិមាណ «ដ៏ច្រើន» នៃសារធាតុអ៊ុយរ៉ានីញ៉ូមចម្រាញ់កម្រិតខ្ពស់ ដែលប្រើសម្រាប់ផលិតក្បាលគ្រាប់នុយក្លេអ៊ែរ។

ប៉ុន្តែនៅក្នុងការបញ្ជាក់ជាសាធារណៈដ៏កម្រ រដ្ឋមន្ត្រីបង្រួបបង្រួមរបស់ប្រទេសកូរ៉េខាងត្បូង បានប្រាប់ថា «ភ្នាក់ងារស៊ើបការណ៍ បានប៉ាន់ប្រមាណថា ការស្ដុកសារធាតុអ៊ុយរ៉ានីញ៉ូមចម្រាញ់កម្រិតខ្ពស់របស់ទីក្រុងព្យុងយ៉ាង ពោលគឺកម្រិតសុទ្ធច្រើនជាង ៩០ភាគរយ រហូតដល់ ២.០០០គីឡូក្រាម»។

លោក Chung Dong-young បានប្រាប់អ្នកសារព័ត៌មានថា៖ «សូម្បីតែពេលនេះ ម៉ាស៊ីនបំបែកសារធាតុអ៊ុយរ៉ានីញ៉ូមរបស់កូរ៉េខាងជើង កំពុងដំណើរការនៅទីតាំងចំនួន ៤ផ្សេងគ្នា»។ អមដោយការបន្ថែមថា ចំនួន ២.០០០គីឡូក្រាមនៃសារធាតុអ៊ុយរ៉ានីញ៉ូមចម្រាញ់កម្រិតខ្ពស់ដែលអាចត្រូវបានបម្រុងទុក ដើម្បីផលិតសារធាតុផ្លាតូនីញ៉ូមតែមួយប៉ុណ្ណោះ គឺគ្រប់គ្រាន់ សម្រាប់ការផលិតអាវុធនុយក្លេអ៊ែរចំនួនដ៏ច្រើនសម្បើមនោះ លោក Chung បានបញ្ជាក់ថា៖ «មានតែសារធាតុប្លាតូនីញ៉ូមពី ៥ ទៅ ៦គីឡូក្រាមប៉ុណ្ណោះ គឺគ្រប់គ្រាន់ ដើម្បីផលិតគ្រាប់បែកនុយក្លេអ៊ែរមួយគ្រាប់ហើយ»។

លោក Chung បានសង្កត់ធ្ងន់ថា «ការបញ្ឈប់ការផលិតនុយក្លេអ៊ែររបស់កូរ៉េខាងជើង គឺជាបញ្ហាបន្ទាន់» ប៉ុន្តែបានអះអាងថា ទណ្ឌកម្មនឹងមិនមានប្រសិទ្ធភាពទេ ហើយថា ដំណោះស្រាយតែមួយគត់ គឺស្ថិតនៅក្នុងកិច្ចប្រជុំកំពូល រវាងទីក្រុងព្យុងយ៉ាង និងទីក្រុងវ៉ាស៊ីនតោន។

គួរបញ្ជាក់ថា មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បាននិយាយនៅសប្តាហ៍នេះថា លោកបើកចំហ ចំពោះកិច្ចពិភាក្សាជាមួយសហរដ្ឋអាមេរិក ដែលអាចឲ្យលោកបន្តរក្សាឃ្លាំងអាវុធនុយក្លេអ៊ែររបស់លោកបាន៕