ក្នុងជំនួបជាមួយប្រធានាធិបតីអាមេរិក លោក ដូណាល់ ត្រាំ មេដឹកនាំ និងរដ្ឋមន្ត្រីចំនួន ៨រូប មកពីប្រទេសអារ៉ាប់ និងរដ្ឋឥស្លាម បានសង្កត់ធ្ងន់លើតម្រូវការ ក្នុងការបញ្ចប់សង្រ្គាមនៅតំបន់ហ្កាហ្សា។

មេដឹកនាំនៃប្រទេសកាតា ហ្ស៊កដានី ទួរគី ឥណ្ឌូនេស៊ី និងប៉ាគីស្ថាន ក៏ដូចជានាយករដ្ឋមន្ត្រីអេហ្ស៊ីប និងរដ្ឋមន្ត្រីការបរទេសនៃអារ៉ាប់រួម និងអារ៉ាប៊ីសាអ៊ូឌីត បានជួបជាមួយលោក ត្រាំ នៅខាងក្រៅសម័យប្រជុំលើកទី៨០ នៃមហាសន្និបាតអង្គការសហប្រជាជាតិ នៅទីក្រុងញូវយ៉ក កាលពីថ្ងៃពុធ។

ពួកគេបានគូសបញ្ជាក់ពី «គ្រោះមហន្តរាយមនុស្សធម៌ និងការបាត់បង់មនុស្សដ៏ច្រើន» នៅតំបន់ហ្កាហ្សា ជាកន្លែងដែលអ៊ីស្រាអែល បានសម្លាប់ជនជាតិប៉ាឡេស្ទីនជាង ៦៥.000នាក់ ចាប់តាំងពីខែតុលា ឆ្នាំ ២០២៣។

ទីភ្នាក់ងារសារព័ត៌មានអារ៉ាប៊ីសាអ៊ូឌីត បានរាយការណ៍ថា ពួកគេបាននិយាយថា សង្រ្គាមមាន «ផលវិបាកធ្ងន់ធ្ងរសម្រាប់តំបន់ និងផលប៉ះពាល់ដល់ពិភពមូស្លីម» ដោយបដិសេធចំពោះការផ្លាស់ទីលំនៅដោយបង្ខំរបស់ជនជាតិប៉ាឡេស្ទីន ចេញពីទឹកដីរបស់ពួកគេ។

មេដឹកនាំទាំងនោះ បានបន្ថែមថា បទឈប់បាញ់បន្ទាន់ ការដោះលែងចំណាប់ថ្នូរអ៊ីស្រាអែលដែលត្រូវបានចាប់ពង្រត់ដោយក្រុមហាម៉ាស និងការបញ្ចូលជំនួយមនុស្សធម៌គ្រប់គ្រាន់ចូលទៅក្នុងតំបន់ហ្កាហ្សា គឺជា «ជំហានដំបូងឆ្ពោះទៅរកសន្តិភាពដ៏ត្រឹមត្រូវ និងយូរអង្វែង»៕