ទីក្រុងហុងកុង រួមជាមួយប្រទេសស្រីលង្កា ឈីលី និងបង់ក្លាដែស កំពុងស្វែងរកការចូលរួមក្នុងភាពជាដៃគូសេដ្ឋកិច្ចទូលំទូលាយក្នុងតំបន់ (RCEP) ដែលគាំទ្រដោយប្រទេសចិន ជាប្លុកពាណិជ្ជកម្មដ៏ធំបំផុតរបស់ពិភពលោក ។ នេះបើយោងតាមមន្ត្រីអាស៊ីអាគ្នេយ៍ ដែលបាននិយាយនៅថ្ងៃព្រហស្បតិ៍ (ទី២៥ ខែកញ្ញា) នេះ។

RCEP បច្ចុប្បន្នមានប្រទេសចិន ជប៉ុន កូរ៉េខាងត្បូង អូស្ត្រាលី នូវែលសេឡង់ និងសមាជិកទាំង១០ នៃសមាគមប្រជាជាតិអាស៊ីអាគ្នេយ៍ ឬអាស៊ាន (ASEAN)។

មន្ត្រី RCEP ដែលកំពុងប្រជុំនៅខាងក្រៅកិច្ចប្រជុំរដ្ឋមន្ត្រីពាណិជ្ជកម្ម និងសេដ្ឋកិច្ចអាស៊ាន ក្នុងប្រទេសម៉ាឡេស៊ី ក្នុងសប្តាហ៍នេះ បាននិយាយថា មានការជំទាស់តិចតួច ក្នុងការទទួលយកប្រទេសដាក់ពាក្យថ្មី ហើយនឹងធ្វើការឆ្ពោះទៅរកការនាំយកបណ្ដាប្រទេសសេដ្ឋកិច្ចទាំង៤ ចូលទៅក្នុងប្លុកនេះ។

អនុរដ្ឋមន្ត្រីពាណិជ្ជកម្មឥណ្ឌូនេស៊ី (លោកស្រី Dyah Roro Esti Widya Putri) បានប្រាប់អ្នកសារព័ត៌មាននៅទីក្រុងគួឡាឡាំពួថា «យើងពិតជាគាំទ្រដល់ប្រទេសណាមួយដែលមានឆន្ទៈចូលរួមជាមួយ RCEP»។

ចំណែករដ្ឋមន្ត្រីពាណិជ្ជកម្មម៉ាឡេស៊ី លោក Tengku Zafrul Aziz បាននិយាយថា ការសម្រេចណាមួយ អំពីសមាជិកថ្មីរបស់ RCEP នឹងត្រូវបានពិភាក្សានៅពេលដែលមេដឹកនាំប្លុកនេះ ជួបគ្នាជាលើកដំបូង ក្នុងរយៈពេល ៥ឆ្នាំក្នុងខែតុលា។ លោក Tengku Zafrul បាននិយាយនៅមុននេះថា RCEP នឹងស្វែងរកការធ្វើឲ្យប្រសើរឡើងនូវកិច្ចព្រមព្រៀងពាណិជ្ជកម្មដែលខ្លួនបានចុះហត្ថលេខាក្នុងឆ្នាំ២០២០ ក្នុងអំឡុងពេលមានកិច្ចប្រជុំកំពូលខែតុលា។

អ្នកវិភាគមួយចំនួនបានពណ៌នា RCEP ថា ជាក្រុមដ៏មានសក្ដានុពលមួយប្រឆាំងនឹងពន្ធដែលដាក់ដោយសហរដ្ឋអាមេរិក ទោះបីជាការផ្តល់របស់ប្លុកនេះ ត្រូវបានចាត់ទុកថា ខ្សោយជាងកិច្ចព្រមព្រៀងពាណិជ្ជកម្ម ក្នុងតំបន់មួយចំនួនផ្សេងទៀត ដោយសារតែផលប្រយោជន៍ប្រកួតប្រជែងក្នុងចំណោមសមាជិករបស់ខ្លួនក៏ដោយ៕