ទីភ្នាក់ងារសារព័ត៌មានអារ៉ាប៊ីសាអ៊ូឌីត បានរាយការណ៍ថា ប្រទេសអារ៉ាប៊ីសាអ៊ូឌីត និងកាតាកាលពីថ្ងៃពុធ បានប្រកាសគាំទ្រផ្នែកហិរញ្ញវត្ថុរួមគ្នាចំនួន ៨៩ លានដុល្លារអាមេរិក ដល់ប្រទេសស៊ីរី។

មូលនិធិដែលផ្តល់តាមរយៈមូលនិធិអារ៉ាប៊ីសាអ៊ូឌីតសម្រាប់ការអភិវឌ្ឍ និងមូលនិធិកាតាសម្រាប់ការអភិវឌ្ឍ នឹងគាំទ្រដល់បុគ្គលិកផ្នែកសាធារណៈ នៅក្នុងប្រទេសស៊ីរី រយៈពេលបីខែ ក្នុងគោលបំណងធានានូវការបន្តផ្តល់សេវាសំខាន់ៗ និងពង្រឹងការបែងចែកថវិការបស់រដ្ឋាភិបាល។

ជំនួយដែលត្រូវបានអនុវត្តនៅក្នុងការសម្របសម្រួលជាមួយកម្មវិធីអភិវឌ្ឍន៍របស់អង្គការសហប្រជាជាតិ (UNDP) ត្រូវបានរៀបចំឡើង ដើម្បីបង្កើនជីវភាពរស់នៅប្រកបដោយនិរន្តរភាព និងលើកកម្ពស់ការស្តារសេដ្ឋកិច្ចទាំងមូល។ ក្រុមមន្ត្រីបាននិយាយថា ជំនួយនេះ ក៏នឹងពង្រឹងប្រព័ន្ធនានា ដើម្បីធ្វើឲ្យប្រសើរឡើងនូវលទ្ធភាពទទួលបានសេវាហិរញ្ញវត្ថុ និងរួមចំណែកដល់គោលដៅអភិវឌ្ឍន៍រយៈពេលវែង នៅក្នុងប្រទេសស៊ីរី។

កាលពីដើមខែនេះ មូលនិធិអារ៉ាប៊ីសាអ៊ូឌីតសម្រាប់ការអភិវឌ្ឍ បានផ្តល់ជំនួយផ្គត់ផ្គង់ដល់ប្រទេសស៊ីរីនូវប្រេងឆៅចំនួន ១,៦៥លានបារ៉ែល។ កាលពីខែសីហា អារ៉ាប៊ីសាអ៊ូឌីត បានចុះហត្ថលេខាលើកិច្ចព្រមព្រៀងមួយ និងអនុស្សរណៈយោគយល់ចំនួន ៦ ជាមួយអាជ្ញាធរស៊ីរី ដែលគ្របដណ្តប់លើវិស័យថាមពលផ្សេងៗនៅខាងក្រៅពិព័រណ៍អន្តរជាតិ នៅទីក្រុងដាម៉ាស៕