នគរបាល នៅព្រឹកថ្ងៃព្រហស្បតិ៍ (ទី២៥ ខែកញ្ញា) នេះ បានឲ្យដឹងថា អាកាសយានដ្ឋាន នៅភាគខាងជើងនៃប្រទេសដាណឺម៉ាក ត្រូវបានបិទ ដោយសារតែយានដ្រូនហោះដោយគ្មានការអនុញ្ញាត នៅក្នុងដែនអាកាសរបស់ខ្លួន ដែលនេះជាការបិទអាកាសយានដ្ឋានជាលើកទី២ នៅដាណឺម៉ាក ក្នុងសប្តាហ៍នេះ ខណៈដែលអឺរ៉ុបកំពុងជួបប្រទះនឹងការកើនឡើងនូវការវាយប្រហារតាមប្រព័ន្ធអ៊ីនធឺណិត និងការសង្ស័យអំពីការរំលោភបំពានដែនអាកាសពីសំណាក់រុស្ស៊ី។

តាមសេចក្ដីរាយការណ៍របស់សារព័ត៌មាន Reuters នគរបាល បាននិយាយថា យានដ្រូនលើសពី ១គ្រឿង ត្រូវបានមើលឃើញកំពុងហោះនៅជិតអាកាសយានដ្ឋាន Aalborg ដែលជាមូលដ្ឋានយោធាសកម្មផងដែរ នៅវេលាម៉ោងប្រហែល ៩:៤៥នាទីយប់ ម៉ោងក្នុងស្រុក នៅថ្ងៃពុធ ហើយនៅតែនៅក្បែរនោះរហូតដល់ម៉ោង ១ព្រឹកថ្ងៃព្រហស្បតិ៍។ តែយ៉ាងណាក្ដី នគរបាលបានបញ្ជាក់ថា យានដ្រូនលែងមានវត្តមាននៅក្នុងតំបន់នោះទៀតហើយ។ ស្នងការនគរបាលជាតិរបស់ដាណឺម៉ាក លោក Thorkild Fogde បានប្រាប់ប្រព័ន្ធផ្សព្វផ្សាយ CNN ថា នគរបាលមិនទាន់កំណត់នៅឡើយទេថា អ្នកណានៅពីក្រោយឧប្បត្តិហេតុចុងក្រោយនេះ ប៉ុន្តែកំពុងស៊ើបអង្កេតលើហេតុផលអាចទៅរួចជាច្រើន។

គួរបញ្ជាក់ថា បើយោងតាមសេចក្ដីរាយការណ៍របស់សារព័ត៌មាន Reuters បានឲ្យដឹងថា វត្តមាននៃយានដ្រូននេះកើតឡើងតែ ២ថ្ងៃប៉ុណ្ណោះបន្ទាប់ពីការមើលឃើញយានដ្រូនធំៗចំនួន ២ ឬ៣គ្រឿង បានធ្វើឲ្យមានការផ្អាកការហោះហើរ និងការចុះចតអស់រយៈពេលជិត ៤ម៉ោង នៅឯអាកាសយានដ្ឋាន ក្នុងរដ្ឋធានី Copenhagen ជាអ្វីអ្វីដែលនាយករដ្ឋមន្ត្រីរបស់ប្រទេសនេះ ហៅថា ជា «ការវាយប្រហារយ៉ាងធ្ងន់ធ្ងរលើហេដ្ឋារចនាសម្ព័ន្ធដ៏សំខាន់របស់ដាណឺម៉ាក»។

វាក៏កើតឡើងផងដែរបន្ទាប់ពីមានការវាយប្រហារតាមអ៊ីនធឺណិតដ៏ធំមួយ នៅឯក្រុមហ៊ុនផ្តល់សេវាពិនិត្យចុះឈ្មោះចូល និងដំណើរការឡើងយន្តហោះ កាលពីចុងសប្តាហ៍ ដែលបានរំខានដល់ប្រតិបត្តិការ នៅអាកាសយានដ្ឋានដ៏មមាញឹកបំផុតរបស់អឺរ៉ុបមួយចំនួន ក្នុងនោះរួមទាំង Heathrow ទីក្រុងឡុងដ្រ៍ផងដែរ៕