ប្រមុខបក្សកុម្មុយនីស្តវៀតណាមលោក To Lam ត្រូវបានគេរំពឹងថា នឹងទៅបំពេញទស្សនកិច្ចនៅកូរ៉េខាងជើង នៅខែក្រោយនេះ ដែលជាដំណើរទស្សនកិច្ចលើកដំបូង ក្នុងរយៈពេលជិត ២០ឆ្នាំ សម្រាប់មេដឹកនាំវៀតណាម ទៅកាន់ប្រទេសឯកោមួយនេះ។

ប្រទេសកុម្មុយនីស្តទាំងពីរ រក្សាទំនាក់ទំនងការទូតយ៉ាងជិតស្និទ្ធ ប៉ុន្តែបច្ចុប្បន្នមិនមានទំនាក់ទំនងពាណិជ្ជកម្មទេ។ នេះបើយោងតាមស្ថានទូតវៀតណាមប្រចាំនៅទីក្រុងព្យុងយ៉ាង។

ដោយការត្រៀមរៀបចំកំពុងតែដំណើរការ ទស្សនកិច្ចដែលអាចកើតឡើងនេះ មិនត្រូវបានភាគីទាំងពីរប្រកាសជាផ្លូវការនោះទេ។ ក្រសួងការបរទេសវៀតណាម និងស្ថានទូតកូរ៉េខាងជើងនៅទីក្រុងហាណូយ មិនបានឆ្លើយតបនឹងសំណើសុំការអត្ថាធិប្បាយទេ។

មន្ត្រីនៃប្រទេសទាំងពីរ បានបដិសេធមិនបង្ហាញពីពេលវេលាច្បាស់លាស់សម្រាប់ដំណើរទស្សនកិច្ច និងបញ្ហាដែលអាចត្រូវបានពិភាក្សា ប៉ុន្តែមន្ត្រីម្នាក់ បាននិយាយថា លោក Lam នឹងជួបជាមួយមេដឹកនាំកូរ៉េខាងជើងលោក គីម ជុងអ៊ុន (Kim Jong Un)៕