វិមានក្រឹមឡាំង នៅថ្ងៃព្រហស្បតិ៍ (ទី២៥ ខែកញ្ញា) បានឲ្យដឹងថា ខ្លួននៅតែជឿជាក់ថា ប្រធានាធិបតីអាមេរិក លោក Donald Trump នៅតែប្តេជ្ញាធ្វើការឆ្ពោះទៅរកការសម្រេចបានសន្តិភាព នៅក្នុងប្រទេសអ៊ុយក្រែន បើទោះជាមេដឹកនាំអាមេរិក បានផ្លាស់ប្តូរវោហាសាស្ត្ររបស់លោកភ្លាមៗដែលបង្ហាញការគាំទ្រទីក្រុងគីវ កាលពីដើមសប្តាហ៍នេះក៏ដោយ។

កាលពីថ្ងៃអង្គារ បន្ទាប់ពីបានជួបជាមួយប្រធានាធិបតីអ៊ុយក្រែន លោក Volodymyr Zelenskyy លោក Trump បាននិយាយថា លោកមានជំនឿថា ទីក្រុងគីវ អាចដណ្តើមយកមកវិញនូវដែនដីទាំងអស់របស់ខ្លួនដែលរុស្ស៊ីបានកាន់កាប់ប្រមាណ ១ភាគ៥ នៃប្រទេស ហើយថា ប្រទេសនេះគួរតែធ្វើសកម្មភាពឥឡូវនេះ ដោយទីក្រុងមូស្គូកំពុងប្រឈមនឹងបញ្ហាសេដ្ឋកិច្ច។

អនុប្រធានាធិបតីរបស់លោក Trump គឺលោក JD Vance បានប្រាប់អ្នកសារព័ត៌មានកាលពីថ្ងៃពុធថា លោក Trump កំពុងតែអស់ភាពអត់ធ្មត់ខ្លាំងឡើងៗ ចំពោះរុស្ស៊ី ដោយសារតែពួកគេមិន «បង្ហាញអ្វីៗឲ្យបានគ្រប់គ្រាន់ សម្រាប់កិច្ចពិភាក្សា ដើម្បីបញ្ចប់សង្រ្គាម»។

លោក Vance បាននិយាយថា៖ «ប្រសិនបើថ្នាក់ដឹកនាំមិនព្រមចរចាដោយស្មោះត្រង់ ខ្ញុំគិតថា វានឹងមានភាពអាក្រក់ខ្លាំងណាស់ សម្រាប់ប្រទេសរបស់ពួកគេ។ នេះជាអ្វីដែលប្រធានាធិបតី បានបញ្ជាក់យ៉ាងច្បាស់។ វាមិនមែនជាការផ្លាស់ប្តូរគោលជំហរនោះទេ។ វាជាការទទួលស្គាល់ការពិតដោយឈរលើមូលដ្ឋាន»។

នៅពេលត្រូវបានសុំឲ្យធ្វើអត្ថាធិប្បាយ ជុំវិញការកត់សម្គាល់របស់លោក Vance និងត្រូវបានសួរថា តើរុស្ស៊ីចាត់ទុកការលើកឡើងនវផ្ទុយពីបំណងប្រាថ្នារបស់ទីក្រុងវ៉ាស៊ីនតោន ក្នុងការជួយបញ្ចប់សង្គ្រាមដែរ ឬយ៉ាងណា អ្នកនាំពាក្យវិមានក្រឹមឡាំង លោក Dmitry Peskov បាននិយាយថា៖ «ទេ វាមិនមែនបែបនោះទេ។ តាមការពិត យើងមើលឃើញវោហាសាស្ត្រនេះផ្សេងពីទីក្រុងវ៉ាស៊ីនតោន។ សម្រាប់ពេលនេះ យើងជឿជាក់ថា ទីក្រុងវ៉ាស៊ីនតោនបន្តមានឆន្ទៈនយោបាយ ហើយលោកប្រធានាធិបតី Trump បន្តមានឆន្ទៈនយោបាយ ដើម្បីបន្តកិច្ចប្រឹងប្រែងឆ្ពោះទៅរកដំណោះស្រាយសន្តិភាពនៅអ៊ុយក្រែន។ យើងគាំទ្រកិច្ចប្រឹងប្រែងទាំងនេះ ហើយរុស្ស៊ីនៅតែបើកចំហ ចំពោះការចរចាសន្តិភាព»៕