ទិន្នន័យផ្លូវការ បានបង្ហាញនៅថ្ងៃព្រហស្បតិ៍ (ទី២៥ ខែកញ្ញា)នេះ ថា បំណុលសាធារណៈរបស់ប្រទេសបារាំង បានកើនឡើងដល់កម្រិតខ្ពស់បំផុត ៣,៤សែនកោដិអឺរ៉ូ (៤សែនកោដិដុល្លារ) ដោយនេះជាការបន្ថែមសម្ពាធលើនាយករដ្ឋមន្ត្រីថ្មី លោក Sebastien Lecornu ខណៈដែលរូបលោកប្រឈមនឹងការតវ៉ា និងភាពចលាចលផ្នែកនយោបាយ។

គួរបញ្ជាក់ថា លោក Lecornu ត្រូវបានតែងតាំងដោយលោកប្រធានាធិបតី Emmanuel Macron នៅដើមខែនេះ ដើម្បីស្នងតំណែងរបស់លោក Francois Bayrou ដែលត្រូវបានសភាបណ្ដេញចេញ អំឡុងការតស៊ូ ជុំវិញគោលនយោបាយកម្រិតថវិការបស់លោក បន្ទាប់ពីបានបំពេញតួនាទីត្រឹមតែ ៩ខែ។

តួលេខពីទីភ្នាក់ងារស្ថិតិ INSEE បង្ហាញថា លោក Lecornu អតីតរដ្ឋមន្ត្រីក្រសួងការពារជាតិ ឥឡូវនេះប្រឈមនឹងបំណុលដែលមានចំនួន ១១៥,៦ភាគរយនៃផលិតផលក្នុងស្រុកសរុប (GDP) របស់ប្រទេសបារាំង នៅក្នុងត្រីមាសទី២។ បំណុលនេះកើនឡើងពី ៣,៣សែនកោដិអឺរ៉ូ ក្នុងខែមីនា ដែលស្មើនឹង ១១៣,៩ភាគរយនៃ GDP។

លោក Lecornu មិនទាន់បង្កើតរដ្ឋាភិបាលថ្មីនៅឡើយទេ ហើយត្រូវតែផ្តល់សំណើថវិកាទៅសភា នៅពាក់កណ្តាលខែតុលា។ សហជីពបានប្រកាសធ្វើបាតុកម្មថ្មី នៅថ្ងៃទី២ ខែតុលា បន្ទាប់ពីមនុស្សរាប់សែននាក់បានតវ៉ានៅទូទាំងប្រទេសបារាំង កាលពីសប្តាហ៍មុន ជុំវិញផែនការកាត់បន្ថយថវិការបស់លោក Macron។

យ៉ាងណាក្ដី លោក Lecornu ដែលជាប្រមុខរដ្ឋាភិបាលទី២ របស់លោក Macron គិតចាប់តាំងពីឆ្នាំ២០១៧ មកនោះ បានប្តេជ្ញាថា នឹងធ្វើអ្វីៗផ្ទុយពីអតីតកាល ក្នុងគោលបំណងដោះស្រាយវិបត្តិនយោបាយ៕