ក្រសួងការពារជាតិ បានឲ្យដឹងនៅថ្ងៃព្រហស្បតិ៍ (ទី២៥ ខែកញ្ញា) នេះថា ប្រទេសទួរគីបានដាក់ពង្រាយយន្តហោះព្រមាន និងគ្រប់គ្រងជាបណ្ដោះអាសន្នទៅកាន់ប្រទេសលីទុយអានី ដែលជាផ្នែកមួយនៃវិធានការសន្តិសុខរបស់អង្គការណាតូ (NATO) បន្ទាប់ពីមានការរំលោភបំពានដែនអាកាសម្តងហើយម្តងទៀតដោយយានដ្រូនរបស់រុស្ស៊ី។ 

គួរបញ្ជាក់ថា ប្រទេសលីទុយអានី អេស្តូនី ដាណឺម៉ាក និងប៉ូឡូញ សុទ្ធតែបានប្រាប់ឲ្យដឹងថា យានដ្រូន ឬយន្តហោះចម្បាំងរបស់រុស្ស៊ី បានរំលោភលើដែនអាកាសរបស់ពួកគេ ក្នុងប៉ុន្មានសប្តាហ៍ថ្មីៗនេះ ដែលជំរុញឲ្យសម្ព័ន្ធមិត្តណាតូបង្កើនការការពារ នៅជុំវិញតំបន់ប៉ែកខាងកើតរបស់អឺរ៉ុប។

តាមរយៈសេចក្តីថ្លែងការណ៍ប្រចាំសប្តាហ៍របស់ខ្លួន ក្រសួងបានឲ្យដឹងថា៖ «នៅក្នុងវិសាលភាពនៃវិធានការធានារបស់ណាតូ (NATO Assurance Measures) ប្រព័ន្ធព្រមាន និងគ្រប់គ្រងលើអាកាសរបស់យើង (AWACS) កំពុងបំពេញបេសកកម្មនៅក្នុងដែនអាកាសលីទុយអានី ចន្លោះថ្ងៃទី ២២-២៥ ខែកញ្ញា»។

AWACS មានសមត្ថភាពចាប់សញ្ញាយានដ្រូនដែលហោះទាប និងវត្ថុផ្សេងទៀតដែលរ៉ាដានៅលើដីមិនអាចចាប់បាន។ យ៉ាងណាក្ដី ក្រសួងមិនបានផ្តល់ព័ត៌មានបន្ថែមឡើយ។ 

ប៉ូឡូញបានបាញ់ទម្លាក់យានដ្រូនមួយចំនួន ហើយកាលពីថ្ងៃអង្គារសភារបស់លីទុយអានី បានផ្តល់អំណាចដល់កងកម្លាំងប្រដាប់អាវុធ ក្នុងការបាញ់ទម្លាក់យានដ្រូនណាមួយដែលរំលោភលើដែនអាកាសរបស់ខ្លួន