ប្រធានាធិបតីអាមេរិកលោក Donald Trump បានជំរុញឱ្យទួរគីឈប់ទិញប្រេងពីប្រទេសរុស្ស៊ី ដែលជាផ្នែកមួយនៃការជំរុញឱ្យកាន់តែទូលំទូលាយក្នុងការកាត់ផ្តាច់ការផ្តល់មូលនិធិថាមពលរបស់ទីក្រុងមូស្គូ ខណៈសង្រ្គាមនៅអ៊ុយក្រែនបន្តឆាបឆេះនៅឡើយ។

ថ្លែងជាមួយលោកប្រធានាធិបតី Recep Tayyip Erdogan នៅសេតវិមាន លោកTrump បាននិយាយថា ការបញ្ឈប់ការនាំចូលទាំងនោះ គឺជារឿងល្អបំផុត ដែលសមភាគីទួរគីរបស់លោកអាចធ្វើបាន។ 

កិច្ចប្រជុំនៅការិយាល័យប្រធានាធិបតី Oval Office បានបញ្ចប់ដោយគ្មានការប្តេជ្ញាចិត្តយ៉ាងម៉ឺងម៉ាត់ក្នុងការដកទណ្ឌកម្មរបស់អាមេរិកលើប្រទេសទួរគី ឬលក់យន្តហោះចម្បាំងទំនើប F-35 ទោះលោក Trump បង្ហាញសុទិដ្ឋិនិយមអំពីបញ្ហាទាំងពីរក៏ដោយ។

ទួរគីត្រូវបានរារាំងជាច្រើនឆ្នាំមិនឲ្យទិញយន្តហោះ F-35 របស់អាមេរិក។ នៅឆ្នាំ ២០១៩ ទួរគីត្រូវបានដកចេញពីកម្មវិធីដែលផលិតគ្រឿងបន្លាស់សម្រាប់យន្តហោះចម្បាំងនេះ បន្ទាប់ពីប្រទេសនេះ បានទិញប្រព័ន្ធការពារដែនអាកាសពីប្រទេសរុស្ស៊ី។  

លោក Trump បានបន្ថែមថាលោកជឿថាលោក Erdogan ត្រូវបានគោរពទាំងប្រធានាធិបតីអ៊ុយក្រែនលោក Volodomyr Zelenskyy ទាំងប្រធានាធិបតីរុស្ស៊ីលោក Vladimir Putin ដែលមានន័យថារូបលោកអាចមានឥទ្ធិពលខ្លាំង លើសង្រ្គាមប្រសិនបើលោកចង់។ 

ការអត្ថាធិប្បាយរបស់ប្រធានាធិបតីសហរដ្ឋអាមេរិក បានកើតឡើងប៉ុន្មានសប្ដាហ៍បន្ទាប់ពីលោកប្រកាន់ជំហរលើការដាក់ទណ្ឌកម្មកាន់តែតឹងរ៉ឹងលើរុស្ស៊ី ប្រសិនបើបណ្ដាប្រទេសណាតូ សម្រេចបានលក្ខខណ្ឌនានា ដែលរួមបញ្ចូលទាំងការឈប់នាំចូលប្រេងពីរុស្ស៊ី៕