ប្រធានអាជ្ញាធរប៉ាឡេស្ទីន លោក Mahmoud Abbas បានសន្យានៅអង្គការសហប្រជាជាតិ កាលពីថ្ងៃព្រហស្បតិ៍ (២៥ កញ្ញា) ថានឹងខិតខំធ្វើការជាមួយលោកប្រធានាធិបតីអាមេរិក Donald Trump អារ៉ាប៊ីសាអ៊ូឌីត បារាំង និងអង្គការសហប្រជាជាតិ លើផែនការសន្តិភាពសម្រាប់តំបន់ហ្កាហ្សា ដែលគាំទ្រយ៉ាងលើសលប់ដោយស្ថាប័នពិភពលោកមួយនេះ។

មហាសន្និបាតអង្គការសហប្រជាជាតិ UNGA ដែលមានសមាជិកចំនួន ១៩៣ប្រទេស បានអនុម័តយ៉ាងលើសលប់ក្នុងខែនេះ នូវសេចក្តីប្រកាស ៧ទំព័រ ដែលមានគោលបំណងជំរុញដំណោះស្រាយរដ្ឋពីរសម្រាប់អ៊ីស្រាអែល និងប៉ាឡេស្ទីន និងបញ្ចប់សង្រ្គាមនៅតំបន់ហ្កាហ្សា រវាងអ៊ីស្រាអែល និងពួកសកម្មប្រយុទ្ធហាម៉ាស។

ដោយឡែក ប្រេសិតពិសេសរបស់អាមេរិក លោក Steve Witkoff ក៏បាននិយាយកាលពីថ្ងៃពុធថា លោក Trump បានបើកបង្ហាញផែនការសន្តិភាព ២១ចំណុចសម្រាប់តំបន់មជ្ឈិមបូព៌ា និងតំបន់ហ្កាហ្សា ក្នុងអំឡុងកិច្ចប្រជុំជាមួយមេដឹកនាំនៃបណ្ដាប្រទេសកាន់សាសនាអ៊ិស្លាមភាគច្រើន នៅខាងក្រៅមហាសន្និបាតអង្គការសហប្រជាជាតិ សប្តាហ៍នេះ។

ថ្លែងតាមរយៈវីដេអូទៅកាន់ជំនួបប្រចាំឆ្នាំនៅទីក្រុងញូវយ៉ករបស់មេដឹកនាំពិភពលោក កាលពីថ្ងៃព្រហស្បតិ៍ បន្ទាប់ពីអាមេរិកមិនផ្តល់ទិដ្ឋាការ លោក Abbas បានបញ្ជាក់យ៉ាងមុតមាំពីកិច្ចសហប្រតិបត្តិការរបស់ភាគីប៉ាឡេស្ទីន ជាមួយលោក Trump និងមេដឹកនាំដទៃទៀតលើផែនការសន្តិភាព ដែលគាំទ្រដោយអង្គការសហប្រជាជាតិ។ លោកក៏បានសម្ដែងការប្រឆាំងយ៉ាងដាច់ខាតលើសកម្មភាពក្រុមហាម៉ាស ហើយបានអំពាវនាវឱ្យក្រុមសកម្មប្រយុទ្ធនេះទម្លាក់អាវុធ និងប្រគល់ការគ្រប់គ្រងតំបន់ហ្កាហ្សា ទៅឱ្យអាជ្ញាធរប៉ាឡេស្ទីន៕