នាយករដ្ឋមន្ត្រីចិនលោក Li Qiang បាននិយាយកាលពីថ្ងៃព្រហស្បតិ៍សប្ដាហ៍នេះថា ដោយសម្លឹងមើលទៅអនាគត ប្រទេសចិន និងសហរដ្ឋអាមេរិក ចាំបាច់ត្រូវស្វែងរកវិធីត្រឹមត្រូវដើម្បីរួមរស់ជាមួយគ្នា។

លោកបានអំពាវនាវឲ្យបង្កើនកិច្ចខិតខំប្រឹងប្រែងពង្រឹងទំនាក់ទំនងចិន-អាមេរិក និងពង្រីកកិច្ចសហប្រតិបត្តិការ។    

លោក Li បានថ្លែងបែបនេះខណៈកំពុងជួបជាមួយបណ្ដាអង្គការជាមិត្តនៅសហរដ្ឋអាមេរិក រួមទាំងតំណាងមកពីក្រុមប្រឹក្សាធុរកិច្ចអាមេរិក-ចិន គណៈកម្មាធិការជាតិស្តីពីទំនាក់ទំនងអាមេរិក-ចិន សភាពាណិជ្ជកម្មសហរដ្ឋអាមេរិក និងក្រុមប្រឹក្សាទំនាក់ទំនងបរទេស ព្រមទាំងអ្នកប្រាជ្ញ និងអ្នកដឹកនាំធុរកិច្ច នៅក្រៅកិច្ចពិភាក្សាទូទៅនៃសម័យប្រជុំលើកទី៨០ របស់មហាសន្និបាតអង្គការសហប្រជាជាតិ។

លោក Li បាននិយាយថា ទំនាក់ទំនងចិន-អាមេរិក គឺជាទំនាក់ទំនងទ្វេភាគីដ៏សំខាន់បំផុតក្នុងពិភពលោក ហើយប្រទេសទាំងពីរគួរតែគោរពគ្នាទៅវិញទៅមក រួមរស់ជាមួយគ្នាដោយសន្តិភាព បន្តកិច្ចសហប្រតិបត្តិការឈ្នះ-ឈ្នះ និងសម្រេចបាននូវវិបុលភាពរួមតាមរយៈភាពជោគជ័យរបស់គ្នាទៅវិញទៅមក។ 

លោកនាយករដ្ឋមន្ត្រីចិន បានបន្ថែមថា ទំនាក់ទំនងសេដ្ឋកិច្ច និងពាណិជ្ជកម្ម គឺជាធាតុផ្សំដ៏សំខាន់នៃទំនាក់ទំនងទ្វេភាគី។ លោកបាននិយាយថា ប្រទេសចិនមានទំនុកចិត្ត និងសមត្ថភាពក្នុងការរក្សាស្ថិរភាព និងការអភិវឌ្ឍសេដ្ឋកិច្ចប្រកបដោយភាពរឹងមាំ និងបង្កើតឱកាសកាន់តែច្រើនសម្រាប់សហគ្រាសមកពីជុំវិញពិភពលោក រួមទាំងក្រុមហ៊ុនអាមេរិកផងដែរ៕