មន្ត្រីបាននិយាយកាលពីថ្ងៃព្រហស្បតិ៍ ទី២៥ ខែកញ្ញា ថា រដ្ឋមន្ត្រីក្រសួងការពារជាតិសហរដ្ឋអាមេរិក លោក Pete Hegseth បានបញ្ជាឱ្យមន្ត្រីយោធាជាន់ខ្ពស់មកពីជុំវិញពិភពលោកជួបប្រជុំគ្នានៅទីក្រុង Quantico រដ្ឋ Virginia នៅសប្តាហ៍ក្រោយ នៅក្នុងកិច្ចប្រជុំដ៏កម្រមួយរបស់ឧត្តមសេនីយ៍ជាន់ខ្ពស់ នៅក្នុងទីតាំងមួយកន្លែង។

វាមិនច្បាស់នោះទេពីមូលហេតុនៃកិច្ចប្រជុំដែលត្រូវបានគេកោះហៅតាមរយៈការជូនដំណឹងភ្លាមៗបែបនេះ។ មន្ត្រីពីររូបបាននិយាយថា កង្វះការពន្យល់បានបង្កឱ្យមានភាពមិនច្បាស់លាស់ក្នុងចំណោមអ្នកដែលត្រូវបានគេរំពឹងថានឹងមកចូលរួម ដែលមន្ត្រីជាន់ខ្ពស់មួយចំនួនមើលការខុសត្រូវលើកងទ័ពរាប់ពាន់នាក់នៅទូទាំងពិភពលោក។

មន្ត្រីអាមេរិកម្នាក់បានប្រាប់សារព័ត៌មានរ៉យទ័រថា «មន្ត្រីជាច្រើនកំពុងព្យាយាមផ្លាស់ប្តូរផែនការរបស់ខ្លួន ហើយពិនិត្យមើលថាតើពួកគេត្រូវចូលរួមដែរឬយ៉ាងណា។ អ្នកនាំពាក្យមន្ទីរបញ្ចកោណ លោក Sean Parnell បានបញ្ជាក់ត្រឹមតែថា «រដ្ឋមន្ត្រីសង្គ្រាម នឹងនិយាយទៅកាន់មេបញ្ជាការយោធាជាន់ខ្ពស់របស់លោកនៅដើមសប្តាហ៍ក្រោយ» ដោយពុំបានផ្តល់ព័ត៌មានលម្អិតបន្ថែមអំពីចំនួន ឬរបៀបវារៈនៃកិច្ចប្រជុំនោះទេ។

វាជារឿងចម្លែកដែលបានកោះហៅមន្ត្រីយោធាជាន់ខ្ពស់ជាច្រើនរូបឲ្យមកជួបប្រជុំគ្នានៅកន្លែងតែមួយ។ សហរដ្ឋអាមេរិក មានមេបញ្ជាការជាន់ខ្ពស់ឈរជើងមានចាប់ពីប្រទេសកូរ៉េខាងត្បូង និងជប៉ុន រហូតដល់តំបន់មជ្ឈិមបូព៌ា។