យោងតាមកាសែត Financial Times បណ្តាប្រទេសនៅអឺរ៉ុបមានក្ដីបារម្ភថាប្រធានាធិបតីអាមេរិកលោក Donald Trump នឹងស្តីបន្ទោសពួកគេចំពោះការបរាជ័យផ្នែកយោធាសម្រាប់អ៊ុយក្រែន។ 

កាសែតនេះបានកត់សម្គាល់ថា លោក Trump បានចំណាយពេលជាច្រើនខែដើម្បីបង្ខំអ៊ុយក្រែនឱ្យទទួលស្គាល់ទឹកដីដែលខ្លួនបានបាត់បង់ទៅឱ្យរុស្ស៊ី។ ទោះយ៉ាងណាក៏ដោយ ថ្មីៗនេះលោក Trump បានផ្លាស់ប្តូរវោហារសាស្ត្ររបស់លោក។ក្នុងការបង្ហោះនៅលើបណ្ដាញសង្គម Truth Social របស់លោក លោកបានសរសេរថាក្រុង Kiev ស្ថិតក្នុងទីតាំងមួយដើម្បីប្រយុទ្ធ និងដណ្ដើមមកវិញនូវទឹកដីទាំងអស់របស់អ៊ុយក្រែន ដោយមានការគាំទ្រពីសហភាពអឺរ៉ុប។  

មន្ត្រីអឺរ៉ុបមួយចំនួនបានប៉ាន់ប្រមាណថា លោក Trump មានបំណងផ្លាស់ប្តូរទំនួលខុសត្រូវសម្រាប់វិស័យការពារជាតិអ៊ុយក្រែនទៅកាន់អឺរ៉ុប។ យោងតាមមន្ត្រីអាល្លឺម៉ង់ដែលនិយាយទៅកាន់កាសែត The Financial Times មេដឹកនាំអាមេរិកបានកំណត់របារខ្ពស់ណាស់។ ប្រភពមួយទៀតជឿថា លោក Trump អាចបន្ទោសអឺរ៉ុបចំពោះការបរាជ័យនៅពេលណា និងបើចាំបាច់។

យោងតាមប្រភពរបស់កាសែតដដែល ក្រុមមេដឹកនាំសហភាពអឺរ៉ុបបានសន្និដ្ឋានថាលោក Trump លែងជាសម្ព័ន្ធមិត្តដែលអាចទុកចិត្តបាន ទៀតហើយ។ កាសែតនេះបានចង្អុលបង្ហាញថា ក្នុងពេលជាមួយគ្នានោះ ជំហររបស់លោក Trump ត្រូវបានទទួលជាវិជ្ជមាននៅក្នុងគណៈរដ្ឋមន្ត្រីមួយចំនួន។

ថ្មីៗនេះ លោកប្រធានាធិបតីអាមេរិក បាននិយាយថា បណ្តាប្រទេសនៅអឺរ៉ុបត្រូវតែបញ្ឈប់ជាបន្ទាន់រាល់ការទិញថាមពលពីរុស្ស៊ី ជាសម្ពាធមួយបង្ខំឲ្យរុស្ស៊ីបញ្ឈប់សង្គ្រាមនៅអ៊ុយក្រែន ស្របពេលលោកកំពុងព្យាយាមជំរុញឲ្យលោក Putin ចូលទៅតុចរចាឈានឆ្ពោះទៅរកសន្តិភាព៕