ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (២៥ កញ្ញា) បានពង្រីកការបង្រ្កាបលើអ្វីដែលលោកកំណត់ថាជា កិច្ចខិតខំប្រឹងប្រែងរបស់ក្រុមឆ្វេងនិយមជ្រុលក្នុងការរៀបចំឱ្យមានអំពើហិង្សាផ្នែកនយោបាយ ចាប់តាំងពីការសម្លាប់លោក Charlie Kirk។

លោក Trump បានចុះហត្ថលេខាលើសេចក្ដីណែនាំមួយ ដែលបញ្ជាក្រុមមន្ត្រីរដ្ឋបាលឱ្យ "ពិនិត្យរក ទប់ស្កាត់ និងរារាំង" ក្រុមជ្រុលនិយមមិនឱ្យប្រព្រឹត្តអំពើហិង្សា និងបិទការផ្តល់មូលនិធិរបស់ក្រុមទាំងនោះ។

លោកក៏ជំរុញឱ្យរដ្ឋមន្រ្តីក្រសួងយុត្តិធម៌ ផ្តល់អាទិភាពដល់ការប្រឆាំងនឹងសកម្មភាពមានការរៀបចំទុកដូចជា "យុទ្ធនាការស៊ើបដំណឹង ការបោកបញ្ឆោតសេវាសង្គ្រោះបន្ទាន់ កុបកម្ម ចោរកម្ម រំលោភបំពាន វាយដំ ការបំផ្លិចបំផ្លាញទ្រព្យសម្បត្តិ រួមទាំងការគំរាមកំហែងនៃអំពើហិង្សា និងអសណ្ដាប់ធ្នាប់ស៊ីវិល"។

បន្ទាប់ពីការសម្លាប់របស់លោក Kirk កាលពីថ្ងៃទី១០ ខែកញ្ញា និងការបាញ់ប្រហារនៅការិយាល័យអនុវត្តច្បាប់អន្តោប្រវេសន៍ និងគយ (ICE) ក្នុងទីក្រុង Dallas កាលពីថ្ងៃទី២៤ ខែកញ្ញាមក រដ្ឋបាលលោក Trump បានបន្ទោសក្រុមឆ្វេងនិយមជ្រុលម្តងហើយម្តងទៀត ដោយគ្មានភស្តុតាង ថាជាផ្នែកនៃយុទ្ធនាការនៃអំពើហិង្សានយោបាយមានការរៀបចំជាមុន។

អ្នកជំនាញខាងភេរវកម្មក្នុងស្រុក និយាយថា ហិង្សានយោបាយនៅអាមេរិកគឺមានលក្ខណៈទ្វេបក្ស ហើយថា ការវាយប្រហារកាន់តែច្រើនជាប្រវត្តិសាស្ត្រ ត្រូវបំផុសគំនិតដោយមនោគមវិជ្ជាស្តាំនិយម។ ក្រុមមន្ត្រីក៏មិនបានរកឃើញភ័ស្តុតាងដែលថា ជនសង្ស័យក្នុងការបាញ់ប្រហារលោក Kirk ឬការបាញ់ប្រហារនៅទីក្រុង Dallas មានទាក់ទងជាមួយក្រុមណាមួយឡើយ៕