សារព័ត៌មាន Axios កាលពីថ្ងៃព្រហស្បតិ៍ (ទី២៥ ខែកញ្ញា) បានរាយការណ៍ថា ប្រធានាធិបតីអ៊ុយក្រែន លោក Volodymyr Zelenskyy បានព្រមានថា វិមានក្រឹមឡាំង នឹងក្លាយជាគោលដៅ ហើយមន្ត្រីរុស្ស៊ី គួរតែពិនិត្យមើលកន្លែងជ្រកការពារពីការទម្លាក់គ្រាប់បែក ប្រសិនបើទីក្រុងមូស្គូ មិនបញ្ឈប់ការលុកលុយប្រទេសរបស់ខ្លួននោះទេ។

លោក Zelenskyy បានប្រាប់សារព័ត៌មាន Axios ក្នុងបទសម្ភាសន៍មួយថា៖ «ពួកគេត្រូវតែដឹងថា កន្លែងជ្រកការពារការទម្លាក់គ្រាប់បែករបស់ពួកគេនៅទីណា។ ពួកគេត្រូវការទីកន្លែងនោះ។ ប្រសិនបើពួកគេនឹងមិនបញ្ឈប់សង្រ្គាមទេ ពួកគេនឹងត្រូវការវាក្នុងករណីណាក៏ដោយ»។

ឆ្លើយតបនឹងការរិះគន់របស់ប្រធានាធិបតីអាមេរិក លោក Donald Trump និងរដ្ឋាភិបាលស្តាំនិយមរបស់លោក ជុំវិញការផ្អាកការបោះឆ្នោតដោយគ្មានកំណត់ ក្នុងសម័យសង្រ្គាម នៅអ៊ុយក្រែន លោក Zelenskyy ក៏បានប្រាប់សារព័ត៌មាន Axios ដែរថា លោកនឹងមិនស្វែងរកការបន្តកាន់អំណាចទៀតឡើយ នៅពេលដែលសន្តិភាពកើតមាន។ លោកបានបញ្ជាក់ថា៖ «គោលដៅរបស់ខ្ញុំ គឺដើម្បីបញ្ចប់សង្រ្គាម មិនមែនដើម្បីបន្តឈរឈ្មោះស្វែងរកតំណែងនោះទេ»។

រុស្ស៊ីបានកាន់កាប់ប្រហែល ២០ភាគរយនៃដែនដីរបស់អ៊ុយក្រែន ហើយបានទម្លាក់គ្រាប់បែក និងបាញ់មីស៊ីល លើទីតាំងស៊ីវិល និងយោធា នៅទូទាំងប្រទេសនេះ ចាប់តាំងបើកការឈ្លានពានទ្រង់ទ្រាយធំ ក្នុងឆ្នាំ២០២២។ តែយ៉ាងណាក្ដី កងកម្លាំងរុស្ស៊ីទើបបានវាយប្រហារអគាររដ្ឋាភិបាលអ៊ុយក្រែន ក្នុងរដ្ឋធានីគីវ ជាលើកដំបូង នៅខែកញ្ញានេះ។

លោក Zelenskyy បានសង្កត់ធ្ងន់ថា៖ «អ៊ុយក្រែននឹងមិនកំណត់គោលដៅជនស៊ីវិលនៅរុស្ស៊ីឡើយ ពីព្រោះយើងមិនមែនជាភេរវករ»។ តែលោកបានបញ្ជាក់ថា អ៊ុយក្រែនរំពឹងថា នឹងទទួលបានអាវុធដ៏មានឥទ្ធិពលរបស់សហរដ្ឋអាមេរិក ដែលលោកមិនបញ្ចេញឈ្មោះ ដើម្បីគំរាមកំហែងការវាយប្រហារចូលយ៉ាងជ្រៅទៅក្នុងដែនដីរុស្ស៊ី៕